Фан бўйича талабаларнинг билим, кўникма ва малакаларига қўйиладиган талаблар

Назорат учун саволлар
1.Муносабатлар маркетингининг моҳияти нимадан иборат?
2.Оммавий маркетинг нима?
3.Хариддан сўнгги муқобилларни баҳолаш деганда нимани тушунасиз?
4.Индивидуаллашган маркетинг қандай амалга оширилади?
5.Сифатни тотал назорат қилиш сиёсатининг моҳияти нимадан иборат?
6. Истеъмолчи билан тескари алоқа деганда нимани тушунасиз?
7.Фойдаланилган маҳсулотлардан озод бўлиш деганда нимани тушунасиз?
8.Ремаркетинг деганда нимани тушунасиз?


7-мавзу учун тавсия этиладиган адабиётлар:

1. 
   Philip Kotler, Kevin Lane Keller. Marketing management. 12 th edition. 2010 by Pearson Education, Inc.p. 815.
   
2. 
   Michael S., Gary B., Søren A., Margaret K.H. Consumer behaviour A European Perspective. Fifth edition, 2006 by Pearson Education, New Jersey, USA. Р. 701.
   
3. 
   Бекмурадов А.Ш., Қосимова М.С., Сафаров Б.Ж. Истеъмолчи психологияси. Ўқув қўлланма. – Т.: ТДИУ, 2007. - 110 бет.
   
4. 
   Меликян О.М. Поведение потребителей: Учебное пособие.-М.: Издательско-торговая корпорация “Дашков и К^о”, 2006.-260 с.
   

8-МАВЗУ. ИНДИВИДУАЛ ФАРҚЛАР

8.1. Иқтисодий ресурслар

8.2. Вақт ва харажатлардаги ўзгаришлар
8.3. Ўрганиладиган ресурслар ёки ахборотни қайта ишлаш


8.1. Иқтисодий ресурслар
«Пул – менга мана шу нарса керак» деб куйланади бир қўшиқда. Кредит карточкалари бўлса ҳам бўлади. Бирон бир бошқа ўзгарувчи кишиларнинг харидларини тушунишда пулдан кўра муҳимроқ бўла олмайди. «Пул – мана шу нарсани ўрганиш лозим», ибораси истеъмолчи ҳулқ-атворини ўрганувчи ҳар қандай киши учун шиор бўлиши мумкин. Амалда ҳар бир маркетинг тадқиқотларида истеъмолчиларни баҳолайдиган асосий ўзгарувчилардан бири сифатида даромад қараб чиқилади.
Қачонлардир мавоза (бартер) – товарни товарга айирбошлаш – оддий ҳолат эди. Бу усул ҳозир ҳам унча ривожланмаган мамлакатларда муҳим ўрин тутади, ҳамда бошқа жамиятлардаги «норасмий» иқтисодий муносабатларда мавжуд бўлади. Етарли даражадаги норасмий иқтисодий муҳит мавжуд бўлиб, унда кишилар у ёки бу ҳисоб-китоблар ва солиқлардан четлаб ўтган ҳолда товар ва хизматларни харид қилишади ёки мавоза (бартер) бўйича айирбошлайдилар. Асосан бу муҳитда таъминланган, маълумотли ва нисбатан ёш кишилар фаолият кўрсатадилар.
Маркетингда иқтисодий ресурсларни айирбошлаш кўриб чиқилади. Ушбу ресурсларни ўлчаш эса ўта мураккаб масала ҳисобланади. Ўлчашларнинг асосий мақсади - турли хил вақт даврларини ёки бозор сегментларини таққослашни амалга ошириш имконини берувчи ҳамда ҳар бир киши учун бир хил маъно берувчи ўзгарувчиларни аниқлаш ҳисобланади. Маркетингга ихтисослашган ташкилотлар одатда сўровномаларда даромад тушунчаси бўйича ўзларининг таърифларидан фойдаланишади. Анкета саволлари уларни респондентлар тушунишлари учун оддий, лекин кейинги таҳлилларда фойдаланиш учун аниқ бўлиши лозим.