Фан бўйича талабаларнинг билим, кўникма ва малакаларига қўйиладиган талаблар

КИРИШ

Мамлакатимиз иқтисодиётини модернизациялаш шароитида истеъмолчилар психологиясини ўрганиш фақат тижорат корхоналарига эмас, балки давлат миқёсида ҳам катта аҳамиятга эгадир. Жумладан, корхона рахбарлари ўз ривожланиш стратегияларини ривожлантиришлари учун истеъмолчилар психологиясини билишлари зарурдир. Шу билан бирга, мамлакатимизда фаолият олиб бораётган корхоналарда истеъмолчилар психологияси бўйича билимлар ва тажрибаларни ошириш муҳим масалалардан ҳисобланади.

Мамлакатимизда яратилаётган қулай шарт–шароитлар иқтисодиётни янада ривожлантириш имконини бермоқда. Ушбу кўрсаткичларни янада ривожлантиришда “Истеъмолчилар психологияси” фанида ўрганиладиган мавзулар ва назарий-амалий масалалар муҳим аҳамият касб этади.


Фаннинг мақсади ва вазифалари
Фанни ўқитишдан мақсад – иқтисодиётни модернизациялаш шароитида инновацион технологияларни кенг жорий этиш, экспортга маҳсулот чиқарадиган корхоналарнинг ташқи бозорларда рақобатбардош бўлишини қўллаб-қувватлаш, хўжалик юритувчи субъектларда тадбиркорлик ва маркетинг фаолиятни тўғри ташкил этиш ва уни бошқариш, тадбиркорлик фаолиятини ривожлантиришни зарурлигини кўриб чиққан ҳолда талабаларда шу соҳада назарий ва амалий профессионал билимини шакллантиришдир.
Фаннинг асосий вазифалари - истемолчилар психологиясининг илмий назарий асослари, истеъмол бозорлари, уларнинг тузилиши ва стратегиялари, истеъмолчи томонидан қарор қабул қилиш жараёнлари, эҳтиёжларни англаш ва излаш, харид олдидан вариантларни баҳолаш, харид қилиш ва қарор қабул қилиш, истеъмол, эҳтиёжларни қондирилиши, фойдаланилган маҳсулотлардан озод бўлиш, индивидуал фарқлар, психологик жараёнлар, атроф-муҳит таъсири каби масалаларни ўрганишдан иборатдир.


Фан бўйича талабаларнинг билим, кўникма ва малакаларига қўйиладиган талаблар
“Истемолчилар психологияси” ўқув фанини ўзлаштириш жараёнида амалга ошириладиган масалалар доирасида талаба:
- истемолчиларнинг психологиясининг назарий асосларини, истеъмолчилар ҳуқуқларини ҳимоя қилиш яъни консьюмеризм ҳаракатининг тобора кучайиб бораётганлигини, глобаллашув жараёнидаги истеъмолчи психологиясидаги ўзгаришларни, ўзаро биргаликда ҳаракат қилиш маркетингини, чакана савдо ва истеъмолчи ўртасидаги муносабатларни билиши керак;
- демографик таҳлилни амалга ошириш, товарларни харид қилиш олдидан вариантларни баҳолаш, истеъмол бозорлари ва уларнинг тузилиши ва стратегияларини ўрганиш, истемолчиларнинг психологиясидаги психологик жараёнларни ўрганиш, истемолчиларнинг психологиясига атроф муҳитнинг таъсирини ўрганиш бўйича кўникмаларига эга бўлиши керак;
- истемолчилар томонидан харид қилиш тўғрисида қарор қабул қилиш жараёни, эҳтиёжларни англаш ва излаш, харид қилиш ва қарор қабул қилиш жараёни, истеъмол, эҳтиёжларни қондирилиши, фойдаланилган маҳсулотлардан озод бўлиш жараёни тўғрисида малакаларига эга бўлиши керак.