Ёнfин хавфсизлиги

Статик кўздан кечириш – кўздан кечиришнинг тури бўлиб, унинг давомида одатда, кўздан кечириш хавфсизлигини таъминлаш чораларидан ташқари, ёнғин зонасида ҳеч нарса ўзгартирилмай аввалги ҳолидек сақланиб қолади. Бинонинг ёнган қисмлари очилмайди, буюмлар ва ускуналар ўринларидан силжитилмайди.
Статик кўздан кечиришнинг асосий вазифаси ёнғиннинг кўзга ташланган белгилари, йўналишлари, ускуна ва буюмларнинг ўзаро жойлашиши ва қолдиқларига қараб ёнғин зонасини қайд қилишдир. Бу ҳолда ёнғин сабабига алоқадор бўлган шахсларнинг излари, ашёвий далилларни топиш эҳтимоли бўлади.
Статик кўздан кечириш ёнғин бўлган бинонинг қисмларини очишда, ёнган буюмлардан хонани тозалашдан кейин сақланиб қолиши мумкин бўлмаган исботлар ва аломатларни қайд қилиш имконини беради.
Омборхоналарда, дўконларда ва шу каби моддий бойликлар сақланадиган биноларда ёнғин бўлганда моддий бойликлар (буюмлар, асбоб-ускуналар) ёнғинни ўчириш ва уларни сақлаб қолиш мақсадида ўринларидан қўзғатилиши, ташқарига олиб чиқишлари мумкин бўлган ҳолларда асосан статик кўздан кечиришнинг роли жуда катта. Бундай ҳаракатлар ёнғин сабабларини аниқлашда ва унинг аломатларининг сақланиб қолишида ўзининг салбий таъсирини кўрсатади, айрим далилларнинг бузилишига ёки умуман йўқолишига ҳам олиб келади. Бундай ҳолларда, ёнғин зонасида кўздан кечириш имкони туғилди дегунча, дарҳол уни амалга оширишга киришилади.
Статик кўздан кечириш натижаларини воқеа содир бўлган жойни кўздан кечириш баённомасида қайд қилиш керак, уларни суратга олиб, чизмаларда кўрсатилади. Статик кўздан кечириш жараёнида ҳолат ўзгаришсиз ва тегилмасдан қолдирилиши керак.

31. 
    Ёнғин бўлган жойни кўздан кечиришни ташкил қилиш / 2; 7/
    

Воқеа жойига чиқиш ва дастлабки ҳаракатлар. Ёнғин бўлган жойни кўздан кечириш дастлабки ва кечиктириб бўлмайдиган тергов ҳаракатларининг комплекс таркибига киргани сабабли айнан мана шу ишларни амалга оширишни тўғри ташкил қилиш ва ўтказиш жуда кўп ҳолатларда ҳал қилувчи аҳамиятга эгадир. Кўздан кечиришни тўғри ташкил қилишнинг энг биринчи шартларидан бири сутканинг қайси вақтидан ва об-ҳавонинг ҳолатидан қатъий назар кечиктирмасдан ҳодиса жойига чиқиш ҳисобланади. Афсуски, кўпинча терговчи ҳодиса жойига нисбатан кечроқ етиб келади, шунинг учун ҳам кўздан кечириш барча зоналар бўйлаб амалга оширилади ва дарров жуда кенг миқёсдаги кечиктириб бўлмайдиган ва ҳал қилиниши зарур бўлган саволлар туғилади.
Агар ҳодиса жойига етиб келиш учун анча вақт сарфланиши керак бўлса, унда бўлинмаларнинг ҳали чиқиши давридаёқ ёнғин жойидаги ҳолатни имкон қадар ўзгартирмасдан сақлаб қолишлари учун зарур кўрсатмалар бериш лозим, етиб келгандан кейин эса бу йўналишда яна қўшимча чоралар кўриш керак. Аввалига батафсил ҳал қилиниши бўлган саволлар билан чалғимасдан, тезкор равишда жойдаги ҳолат билан танишиш лозим. Бунда қисқача қилиб маҳаллий ишчилар, яшовчилар, шоҳидлар, ўт ўчирувчилар сўроқ қилинади, шунингдек қачон, қаерда, ким томонидан, қайси белгилар бўйича ёнғин пайқалганлиги ва ёнғиннинг сабаблари сўралади. Лекин бунда бу маълумотларга асосланиб хулосалар қилишга ҳеч қачон шошмаслик керак. Шунинг учун шундай ҳолатлар ҳам бўлиши мумкинки, агар тажрибали мутахассис томонидан кўздан кечириш амалга оширилаётган бўлса, унда у ҳеч кимни ҳали сўроқ қилмасдан зудлик билан юзаки равишда ҳодиса жойини кузатиши ва ёнғин ўчоғи ва сабаби ҳақида ўзининг тахминий фикрига эга бўлиб, ундан кейингина гувоҳларни сўроқ қилиши мумкин. Бунинг ижобий томони шундан иборатки, терговчи бундан кейин гувоҳларни сўроқ қилишда уларга йўналтирилган конкрет саволлар бериши мумкин.