Ekologiya va gigiyena modulidan o’quv uslubiy majmua

Ob - havo 
Klimatologiyaning asosiy maqsadi, ob-havo deb atalmish meteorologik omillar majmuasini 
inson organizmiga bo‘lgan ta’sirini o‘rganishdan iboratdir. Ob-havo ma’lum bir geografik joydagi 
havo muhitida bo‘ladigan fizikaviy omillar yig‘ndisidan hosil bo‘lgan jarayondir. Ob-havoni hosil 
qiluvchi omillar majmuasiga - quyosh radiatsiyasining jadalligi, havo harorati, namligi, havoning 
harakat tezligi, barometrik bosimi, atmosfera yog‘inlari, atmosferada kuzatiladigan yorug‘lik va 
elektrik hodisalar kiradi. Ob-havoning davriy va davriy bo‘lmagan o‘zgarishlari ma’lum. Davriy 
o‘zgarish deganda - kecha- kunduz davomida havoning o‘zgarishi (erta bilan harorat past, namlik 
yuqori; kunduzi esa haroratning ko‘tarilishi va namlikning pasayishini kiritish mumkin. Aperiodik, 
ya’ni davriy bo‘lmagan o‘zgarishga geografik joydagi turli havo oqimlari tufayli ob-havoning 
to‘satdan o‘zgarishlarini kiritish mumkin. Muayyan geografik joyda barometrik bosimning keskin 
pasayib ketishi siklonlarning paydo bo‘lishiga olib keladi, natijada bunday joylarga bosimi baland 
bo‘lgan geografik joylardan havo oqimlari kirib keladi. Natijada havo muhitida namlik miqdori 
konsentratsiyalanib, bulutlarning hosil bo‘lishi va atmosfera yog‘inlarining bo‘lishiga sabab bo‘ladi. 
Antitsiklon esa aksincha shu joyda havoning yana asli holiga qaytishi bilan ta’riflanadi. Bunda yoz 
kunlari havo ochiq va quruq, qish kunlari esa quruq sovuq havo oqimi kuzatiladi. 
Iqlim va ob-havoning odam organizmiga ta’siri 
Iqlim va ob-havoning odam organizmiga ta’sirini o‘rganish tibbiy-biologik muammolar 
ichida eng asosiylaridan biri hisoblanadi. Hozirgi kunda bu muammo bioklimatologiya nomi bilan 
ataladi, chunki u faqat kasalliklarning oldini olibgina qolmay, balki ba’zi bir kasalliklarning 
zo‘rayib ketmasligining oldini olish uchun ham zaruriy chora-tadbirlarni ishlab chiqadi. Hozirgi 
zamon fani va texnikasining ilg‘or tajribalaridan foydalanib, koinot sirlarini chuqurroq o‘rgangan 
holda va bu omillarning ta’sirini insonning ruhiy holatiga salbiy ta’sir etmagan holda aholi ongiga 
singdirib borish katta ahamiyatga egadir. Turli iqlimiy omillarning inson organizmiga ta’sir etish 
xususiyatlarini ko‘rib chiqamiz.