Эгамбердиева Т

7-БОБ. ЎЗБЕКИСТОННИНГ БМТНИНГ ТАЪЛИМ, ФАН ВА МАДАНИЯТ МАСАЛАЛАРИ БЎЙИЧА ТАШКИЛОТИ (ЮНЕСКО) БИЛАН ҲАМКОРЛИК АЛОҚАЛАРИ


7. 1. Ўзбекистон-ЮНЕСКО: фан ва таълим соҳасидаги ҳамкорлик алоқалари
Ўзбекистон Республикаси Таълим, фан ва маданият масалалари бўйича Бирлашган миллатлар ташкилотига (ЮНЕСКО) 1993 йил 26 октябр куни Париж шаҳрида ўтказилган ЮНЕСКО Бош анжуманининг 27-сессиясида қабул қилинган.
ЮНЕСКО билан Ўзбекистон Республикаси ҳукумати ўртасида биринчи меморандум 1995 йил 25 август куни ЮНЕСКО Бош директори Федерико Майорнинг Ўзбекистонга ташрифи доирасида имзоланган. Тошкент шаҳрида ЮНЕСКО Ваколатхонасини очиш тўғрисидаги шартнома 1996 йил 23 апрел куни Ўзбекистон Республикаси Президенти Ислом Каримовнинг Париж шаҳридаги ЮНЕСКО Бош қароргоҳига расмий ташрифи доирасида имзоланган. Режалаштирилган лойиҳаларнинг муваффақиятли амалга оширилганидан сўнг, 2006 йил 8 сентябр куни ЮНЕСКО Бош директори Коичиро Мацууранинг Ўзбекистонга ташрифи доирасида ЮНЕСКО билан Ўзбекистон Республикаси ҳукумати ўртасида янги меморандум имзоланди. ЮНЕСКО ташкилоти билан ҳамкорлик Ўзбекистон Республикасининг ЮНЕСКОдаги Доимий ваколатхонаси ва ЮНЕСКО ишлари бўйича Ўзбекистон Республикаси Миллий комиссияси орқали мувофиқлаштирилади¹.
1995-2009 йилларда Ўзбекистон Республикаси ЮНЕСКОнинг қуйидаги қўмиталарига сайланган:
1995 – 1997 ЮНЕСКО Бош қароргоҳи қўмитаси;
1995 – 2005 «Марказий Осиё цивилизацияларининг тарихи» халқаро илмий қўмитаси;
1997 – 2001 ЮНЕСКО Ижроия кенгаши;
1999 – 2001 Орол денгизи муаммоллари бўйича илмий-маслаҳат қўмитаси;
1999 – 2001 ЮНЕСКО ишлари бўйича Миллий комиссиялар доимий қўмитаси;
1999 – 2000 Динлараро мулоқот бўйича халқаро маслаҳат қўмитаси;
2001 – 2005 Инсониятнинг оғзаки ва номоддий маданий мероси дурдоналарини эълон қилиш халқаро ҳайъати;
2001 ЮНЕСКО Бош анжумани 31-сессиясининг Ваколат қўмитаси;
2001 – 2005 Коммуникацияни ривожлантириш ҳукуматлараро қўмитаси;
2005 ЮНЕСКО Бош анжумани 33-сессиясининг Маданият комиссияси;
2005 – 2009 «Жаҳон хотираси» дастури халқаро маслаҳат қўмитаси;
2005 – 2009 Ижтимоий ўзгаришлар бошқаруви (МОСТ) дастурининг ҳукуматлараро кенгаши;
2007 ЮНЕСКО Бош анжумани 34-сессиясининг Юридик қўмитаси;
2009 – 2013 ЮНЕСКО Ижроия кенгаши.