Ё. Н. Файзиев,А. М. Ашурметов, А. Ж. Хамраев,М. Н. Агзамова, М. Д. Ахмедов, Билим соҳаси ижтимоий таъминот ва соғлиқни сақлаш-500000 Таълим сохаси соғлиқни сақлаш -510000

в) Лазерли фотокоагуляция, плазмали скальпел. ушбу усуллар хирургиядаги янги технологияларга хосдир. Уларнинг ишлаш принципи диатермокоагуляция усули билан бир хил (маҳаллий коагуляцион некрозни ҳосил қилиш), лекин бу усуллар қон кетишини дозали равишда ва юмшоқроқ тарзда тўхтатиш имконини беради. Бу эса айниқса паренхиматоз қон кетишларида жуда муҳим ҳисобланади.
Ушбу усуллардан (плазмали скальпел) тўқималарни ажратишда ҳам фойдаланилиши мумкин. Лазерли фотокоагуляция ва плазмали скальпел усуллари жуда самарали ва анъанавий ҳамда эндоскопик хирургиянинг имкониятларини жуда кенгайтиради.
Кимёвий усуллар
Қўлланиш усулига кўра барча барча кимёвий ва биологик усуллар маҳаллик ва умумий (ёки резорбтив таъсирли) турларга бўлинади.
Маҳаллий гемостатик воситалар
Маҳаллий гемостатик воситалар жароҳатдаги, қориндаги ва бошқа шиллиқ пардалардаги қон кетишларни тўхтатишда қўлланилади.
Бунда ишлатиладиган асосий дори воситалари:
1. Водород перекиси. Жароҳатдаги қон кетиши ҳолатларида қўлланилади, тромблар ҳосил қилишини тезлаштириш ҳисобига таъсир кўрсатади.
2. Қон томирини торайтирувчи воситалар (адреналин). Тишни суғуриб олиш олдидан қон кетиши профилактикаси мақсадида фойдаланилади, қорин соҳасида қон кетишида шиллиқ қатлам остига юборилади ва бошқалар.
3. Фибринолиз ингибиторлари – эпсилон-аминокапрон кислотаси. Қорин соҳасида қон кетишида қоринга юборилади.
4. Желатин дори воситалари (геласпон). Кўпиртирилган желатиндан тайёрланган губкасимон модда. Желатин билан қон тактга киришган тромбоцитлар шикастланиб, тромбнинг ҳосил бўлишини тезлаштирувчи омиллар ажралиб чиқади. Бундан ташқари, тампонлаш таъсирига ҳам эга. Хирургия амалёти жараёнидаги ёки тасодифий жароҳатда қон кетишини бартараф этиш учун қўлланилади.
5. Мум. Унинг тампонлаш таъсиридан фойдаланилади. Мум билан бош суяги шикастланган текис суяклари (жумладан, бош суяги трепанациясида) юзаси “елимлаб ёпиштирилади”.
6. Карбазохром. Капилляр қон томирлари ва паренхиматоз соҳаларда қон кетишида фойдаланилади. Қон томирлари ўтказувчанлигини камайтириб, микроциркуляцияни меъёрлаштиради. Эритма билан бўктирилган салфеткалар жароҳатланган юзага ёпиб қўйилади.