Давлат ва жамият қурилиши ҳамда ижтимоий-сиёсий соҳадаги ислоҳотлар бўйича саволлар

62. Яқин келажакда Ўзбекистонда атом электр станцияси курилиши биз учун нега керак ва унинг аҳамияти нимада?
Ўзбекистонда АЭСни қуриш қарори ўз-ўзидан, шунчаки қабул қилинган эмас. Бунинг учун ҳар томонлама чуқур ҳамда пухта таҳлилий ўрганишлар олиб борилди, хорижий тажриба ва соҳадаги замонавий тенденциялар эътиборга олинди. АЭСнинг қурилиши иқтисодий зарурат эди. Боиси ҳозирги кунда аҳоли сони кўпайиши билан электр энергиясига бўлган талаб ҳам ошиб боряпти. Тахминларга кўра, 2030 йилга бориб, бугунги кундагига нисбатан ушбу ресурсга бўлган талаб 2 баробар ошиши кутилмокда. АЭС қурилиши эса ана шундай мураккаб масалалар ечимида ва аҳоли фаровонлигини таъминлашда катта роль ўйнайди. Юртимиз истиқболидаги ўрни катта. Самарадорлик ва экологик томондан атом энергетикасига тенг келадиган бошқа муқобил манба ҳозирча мавжуд эмас. Нефть-газ, кўмир, атомни ёқиш ҳамда муқобил йўл билан олинадиган энергиялар орасида атом энергияси энг тозаси. Чунки у зарарли газлар чиқармайди, сувни тежайди ва узоқ йил бемалол хизмат қилиб бериши мумкин. Шу жиҳатлари билан АЭС устундир. Барқарор ҳамда экологик тоза энергия манбасини олиш учун ишни ҳозирданоқ бошлаш лозим. Атом электростанциясинииг барпо этилиши ана шундай мақсадда босилган дастлабки қадам бўла олади.
63. Фуқаролик жамиятида жамоатчилик назоратининг ўрни нималарда кўринади?
Жамоатчилик назорати фуқаролик жамиятининг асосий устунларидан бири сифатида фақатгина жамият учун эмас, балки давлат ҳокимияти ҳамда бошқаруви органлари фаолиятини самарали ташкил этишда муҳим аҳамиятга эга.
Мазкур масаланинг демократик жамият шароитидаги ўрнини инобатга олиб махсус Қонун қабул қилинди. Ўзбекистон Республикасининг 2018 йил
12 апрелдаги “Жамоатчилик назорати тўғрисида”ги Қонунига мувофиқ, жамоатчилик назоратини Ўзбекистон Республикаси фуқаролари, фуқароларнинг ўзини ўзи бошқариш органлари, нодавлат нотижорат ташкилотлари ҳамда оммавий ахборот воситалари олиб бориш ҳуқуқига эгалиги белгилаб қўйилди.
Ушбу Қонунда жамоатчилик назоратининг объекти қуйидагилар ҳисобланади:

• 
  қабул қилинаётган норматив-ҳуқуқий ҳужжатларда, дастурларда жамоатчилик манфаатлари ва фикрини ҳисобга олиш;
  
• 
  фуқароларнинг ҳуқуқ ва қонуний манфаатларини ҳимоя қилиш соҳасидаги фаолияти;
  
• 
  ўз зиммасига юклатилган вазифа ва функцияларни самарали бажариш;
  
• 
  сифатли давлат хизматлари кўрсатиш;
  
• 
  ижтимоий шериклик доирасида битимлар, шартномалар, лойиҳа ва дастурларни бажариш бўйича фаолияти жамоатчилик назоратининг объектидир.
  

Жамоатчилик назорати қонунларнинг самарали ишлашини таъминлашга, инсон ҳуқуқ ва эркинликларини ҳурмат қилиш билан бирга, уни муҳофаза этишга даъват қилади, давлат тузилмаларининг такомиллашувини таъминлайди. Бу эса пировардида жамоатчилик назорати орқали бугунги кунда ўта долзарб ҳисобланиб келинаётган давлат органлари мансабдор шахсларининг жавобгарлиги ҳамда масъулиятини оширишга замин яратади.