Давлат ва жамият қурилиши ҳамда ижтимоий-сиёсий соҳадаги ислоҳотлар бўйича саволлар

ДАВЛАТ ВА ЖАМИЯТ ҚУРИЛИШИ ҲАМДА ИЖТИМОИЙ-СИЁСИЙ СОҲАДАГИ ИСЛОҲОТЛАР БЎЙИЧА САВОЛЛАР


1.Ўзбекистон Республикаси Конституциясининг мазмун ва моҳиятини изоҳлаб беринг.
Ўзбекистон Республикаси Конституциясининг жамият ҳаётидаги тутган ўрни қуйидагиларда намоён бўлади:
Биринчидан, Конституциянинг муқаддимасида инсон ҳуқуқларига, давлат суверенитети принципларига содиқлик, давлатнинг халқ олдидаги юксак масъулияти, Ўзбекистоннинг демократия ва ижтимоий адолат тамойилларига садоқати, халқаро ҳуқуқ нормаларининг устунлиги, инсонпарвар демократик ҳуқуқий давлат барпо этишга интилиш тўғрисидаги қоидалар мавжуддир.
Иккинчидан, Конституцияда Ўзбекистон иқтисодиётининг негизини хилма-хил шакллардаги мулк ташкил этиши белгилаб қўйилган. Конституцияга кўра, хусусий мулк бошқа мулк шакллари каби дахлсиз ва давлат ҳимоясидадир
(53-модда).
Учинчидан, сиёсий партиялар, жамоат бирлашмалари, оммавий ахборот воситалари фуқаролик жамиятининг муҳим институти сифатида жамият сиёсий ҳаётида плюрализмнинг, яъни фикрлар хилма-хилли­гининг ифодачиси ҳамда давлат ҳокимияти устидан самарали жамоат назорати ўрнатувчи восита мақомида фаолият юритиб, жамият ҳаётида муҳим аҳамият касб этмоқдалар.
Тўртинчидан, Конституция Ўзбекистоннинг халқаро муносабатлардаги тенг ҳуқуқли субъект сифатидаги мақомини мустаҳкамлаб қўйди. Зеро, Ўзбекистон фақат давлат мустақиллигини эълон қилганидан кейингина халқаро майдоннинг тўла ҳуқуқли аъзосига айланди.
Бешинчидан, Конституциявий нормалар асосида маҳаллий ўзини ўзи бошқариш органлари тизими ҳисобланган маҳалла институтига алоҳида эътибор қаратилган.
Олтинчидан,давлат ҳокимиятининг бирдан бир манбаи халқ эканлиги тўғрисидаги ғоя Конституциянинг ҳар бир бандининг мазмунига сингиб кетган. Бинобарин, Консти­туциянинг: “Давлат халқ иродасини ифода этиб, унинг манфаатларига хизмат қилади” (2-модда); “Халқ давлат ҳокими­ятининг бирдан-бир манбаидир. Ўзбекистон Республикасида давлат ҳокимияти халқ манфаатларини кўзлаб ва Ўзбекистон Республикаси Конституцияси ва унинг асосида қабул қилинган қонунлар ваколат берган идоралар томонидангина амалга оширилади”
(7-модда) ва бошқалар.