Давлат ва жамият қурилиши ҳамда ижтимоий-сиёсий соҳадаги ислоҳотлар бўйича саволлар

56. Ўзбекистоннинг ташқи сиёсатидаги бош устувор йўналиш бўйича қандай ишлар амалга оширилмоқда?
“Ўзбекистоннинг ташқи сиёсатида Марказий Осиё – бош устувор йўналиш” тамойили амалга татбиқ этилмоқда. Натижада, минтақамизда мутлақо янги сиёсий муҳит яратилди, ўзаро ишонч ва яхши қўшничилик асосидаги алоқалар мустаҳкамланмоқда.
Туркманистон ва Қирғизистон билан стратегик ҳамкорлик ўрнатилди. Қозоғистон билан стратегик ҳамкорликни янада чуқурлаштириш борасида бир қатор муҳим ҳужжатлар имзоланди, 2 миллиард доллар миқдорида иқтисодий битимлар тузилди. Тожикистон билан ҳам ҳамкорлик ҳар томонлама мустаҳкамланмоқда. Тошкент ва Душанбе шаҳарлари ўртасида авиақатнов йўлга қўйилди. Қирғизистон билан давлат чегаралари ўртасидаги битимнинг имзоланиши Марказий Осиёда хавфсизлик ва барқарорликни таъминлашга қаратилган катта қадам бўлди. Қўшни Афғонистон билан ўзаро манфаатли ҳамкорлик йўлида муҳим келишувларга эришилди, янги иқтисодий лойиҳалар бўйича амалий ишлар бошланди.
Ўзбекистон Президенти Шавкат Мирзиёев 2018 йил 24 август куни Туркманбоши шаҳрида Оролни қутқариш халқаро жамғармаси таъсисчи давлатлари раҳбарлари кенгашининг мажлисида иштирок этди. Марказий Осиё нафақат географик ва геосиёсий, балки қадриятлари муштарак ягона маданий макондир. Минтақада истиқомат қилаётган халқларни умумий маънавий қадриятлар ва ўтмиш, ўхшаш миллий анъана ва урф-одатлар, асрлар давомида шаклланган менталитет бирлаштириб туради.
57. regulation.gov.uz веб-сайтининг мақсад ва вазифалари нималардан иборат?
Мазкур интернет сайти Ўзбекистон Республикаси норматив-ҳуқуқий ҳужжатларининг муҳокамаси портали бўлиб, унда:

1. 
   муаммони, уни тартибга солишнинг мақсади ва мавжуд ечимини таҳлил қилиш орқали норматив-ҳуқуқий ҳужжатни қабул қилишда вужудга келган (ёки вужудга келиши мумкин бўлган) ижобий ва салбий оқибатларни аниқлаш;
   
2. 
   ишлаб чиқилаётган норматив-ҳуқуқий ҳужжат лойиҳасида ёки қабул қилинган норматив-ҳуқуқий ҳужжатда давлат ҳокимияти ва бошқаруви органлари тизимида коррупция, бошқа ҳуқуқбузарликлар содир этилиши учун шароит яратадиган, тадбиркорлик субъектлари учун ортиқча маъмурий ҳамда бошқа чекловларни жорий этадиган ёки жорий этишга шароит яратадиган қоидаларни аниқлаш;
   
3. 
   тадбиркорлик субъектларида асоссиз харажатлар пайдо бўлишига олиб келувчи ҳолатларни аниқлаш кўзда тутилган.