Дала экинларининг асосий зараркунандалари

Кураш чоралари. Колорадо қўнғизининг ўтишига йўл қўймаслик учун шу ҳашарот тарқалган жойлардан картошка келтириш таъқиқланади. Колорадо қўнғизи тушган минтақаларнинг ён-веридаги жойлардан бу ҳашарот учиб ўтиши мумкин бўлган зонада уни ўз вақтида аниқлаш ва янги ўчоқларини тез тугатиш мақсадида ҳар йили картошка экинлари текшириб турилиши лозим. Колорадо қўнғизи пайдо бўлиши мумкин бўлган янги ўчоқларни аниқлаш мақсадида картошка экинлари бир мавсумда 4 марта: иккинчи ёшдаги личинкалар пайдо бўладиган даврда, тўртинчи ёшдаги личинкалар пайдо бўладиган ва биринчи насл қўнғизлари тупроқдан чиқадиган даврда-иккинчи наслнинг 2-3 ёшдаги личинкалари пайдо бўладиган даврда ва ниҳоят иккинчи насл қўнғизлари тупроқдан чиқадиган даврда текширилади. Аввалги йили қўнғиз топилган ва уни тугатиш учун зарур чоралар кўрилган далаларни текшириш учун кўкламда, қўнғизлар уйғонган вақтдан тортиб мумкин қадар ҳар куни, айниқса картошка палагини ёзган даврда уни кўздан кечириб туриш керак Бултур колорадо қўнғизи тушган далага бу йил картошка экилмай, бошқа экин экилган бўлса, бултурдан қолган картошка доналаридан чиққан пояларини синчиклаб кўздан кечириш керак.
Картошка экилган далани текширганда ҳар бир тупни (айниқса баргларнинг пастки томонини) кўздан кечириш керак; текширувчилар кенг саф бўлиб юрадилар, уларнинг орасида картошка қаторлари иккитадан ортиқ бўлмайди. Текшириш вақтида қўнғиз тухумлари, личинкалари ва имагоси топилса, консервловчи эритма (масалан, ош тузининг тўйинган эритмаси) қуйилган банкага солинади. Ҳашарот топилган жой ва вақти карантин инспекциясига дарҳол маълум қилиниши, тўпланган қўнғиз намуналари эса дарров топширилиши лозим. Ҳашарот топилган жойлар нишон қозиқ қоқиб қайд қилинади.
Колорадо қўнғизи топилгандан кейин 10 кун ичида шу жойдан 1 км радиусдаги барча картошка далаларига профилактик мақсадда дори пуркалади ва чангланади: 65 % ли полихлорпинен концентратининг 0,75 %ли эритмаси ўсимликларга пуркаш учун энг яхши инсектициддир; кальций арсенатнинг 3-4 % ли суспензияси ҳам ишлатилади, бу дори гектарига 400-600 л ҳисобидан пуркалади. Кальций арсенат гектарига 8-12 кг ҳисобидан чангланади. Далалар инсектицидлар билан дорилангандан 7-10 кун кейин картошка экинларини контрол мақсадида текшириш керак.