Дала экинларининг асосий зараркунандалари

Ҳаёт кечириши. Австралия тарновсимон қурти янги жойларга асосан кўчат билан тарқалади. Бирмунча яқин жойларга личинка стадиясида (асосан 1-ёшдаги личинкалар-бродяжкалар стадиясида) қушлар, шамол, кишилар кийим-кечаги ва ҳайвонлар жуни билан ўтиши мумкин.
Тарновсимон қуртни Марказий Осиёга энг яқин ўчоғи- Кавказнинг Қора денгиз соҳилида зарарлаган дарахтларда сўнгги ёшдаги личинка стадиясида қишлайди. Личинкалар май бошларида ривожланишни тугаллаб, вояга етган урғочи қуртларга айланади. Кавказнинг Қора денгиз соҳилида тарновсимон қуртнинг эркаги топилгани йўқ, бу ерда тарновсимон қурт нуқул партеногенетик йўл билан кўпаяди.
Личинка пўст ташлаб вояга етгач, урғочилари тез орада тухум халталарини чиқаради (бу халталар кўпинча овисаклар деб аталади) ва тухум қўяди. Об-ҳаво шароитига ва озиқланадиган ўсимлигининг хилига қараб, урғочи ҳашаротлар умрида 30 дан 2000 гача, ўрта ҳисоб билан 1200 та тухум қўяди.
Тухумлардан личинка чиқиш даври об-ҳаво шароитига қараб 4 кундан 60 кунгача давом этади. Ёш личинкалар овисаклардан ўрмалаб чиқиб тарқалиб кетади, бир-икки кундан кейин дарахт шохлари ва таналарига ёпишиб олиб ҳаракатланмай қўяди. 15-30 кундан кейин личинка пўст ташлаб иккинчи ёшга ўтади. Пўст ташлагандан кейин личинкалар яна субстратга ёпишиб олмагунларича ҳаракатланаверадилар. Эркак личинкалар 2-ёшни ўтгандан сўнг дарахтларнинг шохларида, танасида, пўстлоқ ёриқларида ёки дарахтлар тагидаги тупроқ доналари остида қимирламайдиган, озиқланмайдиган «ғумбак»ларга айланади. Урғочилари учта личинкалик ёшини ўтади. Ҳар ёшни ўтиш даврлари баравар.
Австралия тарновсимон қурти йилига 2-3 насл беради.
Кураш чоралари. Четдан келтирилган материаллардан Австралия тарновсимон қурти топилганда улар цианид кислота билан фумигация қилинади. Кўчатларни зарарсизлантиришда Комсток қуртига қарши курашда қандай иш кўрилган бўлса, бунда ҳам шундай иш кўрилади.
Тарновсимон қурт тарқалган жойларда унга қарши курашда биологик усулдан муваффақият билан фойдаланилмоқда, яъни тарновсимон қуртдан зарар кўра бошлаган боғларга Rodolia cardinalis Muls. қўнғизи қўйиб юборилмоқда. Кимёвий препаратлардан фосфорорганиқ инсектицидлар тажрибада яхши натижа берди.