Дала экинларининг асосий зараркунандалари

Бошқа мамлакатлардан келиб қолиши мумкин бўлган асосий
зараркунандалар
Ушбу параграфда эслатилганидек қон бити (Eriosoma lanigerum Hausm.), калифорния қалқондори (Diaspidiotus perniciosus Comst.) ва комсток қурти (Pseudococcus comstocki Kuw.) ўсимликларнинг ички карантин объектлари ҳисобланади. Марказий Осиёнинг уруғли мева дарахтларида комсток қурти оз бўлсада баъзан учраб туради.
Марказий Осиёда учрамайдиган тут қалқондори (Pseudaula caspis pentagona Tagr.), зайтун сохта қалқондори (Saissetia oleae Bern.), япон бузоқбоши қўнғизи (Aserica japonica Motsch.), япон қўнғизи (Popillia japonica New.) вa Ўрта денгиз мева пашшаси (Ceratitis capitata Wied.) уруғли, мевали боғлар учун хавфли зараркунандалардир. Тут қалқондори, зайтун сохта қалқондори ва япон бузоқбоши қўнғизи, япон таёқчасимон қалқондори, япон камфора қалқондори, олма пашшаси, шарқ олма қурти, америка оқ капалаги ҳақидаги материаллар шу ерда баён этилади


Япон таёқчасимон қалқондори
Leucaspis japonica Ckll.
Зарари. Бу ҳашарот кўпгина мева дарахтларига (олма, беҳи, нок, данакли мева дарахтлари, цитрус ўсимликлари, хурмо, анжир ва бошқалар) ҳамда манзарали дарахтлар ва буталар (магнолия, сирень, атиргул, заранг дарахти, терак ва ҳоказо)га зарар етказади. Япон таёқчасимон қалқондори баргларни сўлитиб тўкиб юборади, новдаларни ва шохларни қуритади, баъзан эса бутун-бутун дарахт ва буталарни нобуд қилади. Қалқондор тушган мевалар доғлари борлиги учун бракка чиқарилади.
Тарқалиши. Япония, Хитой, Ҳиндистон, Бразилия, Калифорнияда учрайди. Владивостокда, Кавказнинг қopa денгиз соҳилидаги Батуми, Кобулети ва Поти туманларида тарқалган жойлари бор.
Таърифи. Урғочисининг қалқони чўзиқ бўлиб, бош томонидан орқа томонига қараб секин-аста кенгая боради, узунасига кетган ва оч кул ранг-оқ тусли қирраси бор. Қалқоннинг узунлиги 1,5-2 мм. Эркаги майдароқ бўлиб, бир жуфт қаноти бор, қорнининг учи ўткирланган.
Тухуми жуда майда, оч гунафша тусли.