|
Aniqlovchi
Ona tili (5-sinf)
Hokim bo‘lakdan anglashilgan narsaning qandayligi, kimga yoki nimaga qarashli ekanligini bildirib, qanday?, qanaqa?, qaysi?, qancha?, nechta?, kimning?, nimaning? kabi so‘roqlarga javob bo‘luvchi gap bo‘lagiga aniqlovchi deyiladi.
Aniqlovchilar ma’nosiga ko‘ra ikki xil bo‘ladi. 1. Sifatlovchi aniqlovchi. 2. Qaratqich aniqlovchi. Tahlilda aniqlovchilar ostiga to‘lqinli chiziq ( ) chiziladi.
Hokim bo‘lakdan anglashilgan narsaning belgisini bildirib, qanday?, qanaqa?, qaysi?, qancha? so‘roqlariga javob bo‘lgan aniqlovchiga sifatlovchi aniqlovchi deyiladi.
Hokim bo‘lakdan anglashilgan narsaning uchta shaxsdan biriga qarashli ekanligini bildirib, kimning?, nimaning?, qayerning? so‘roqlariga javob bo‘lgan aniqlovchiga qaratqich aniqlovchi deyiladi.
Qaratqich aniqlovchi doimo aniqlanmishga bog‘lanadi. Ana shu belgisi bilan tushum kelishigini olgan to‘ldiruvchidan farq qiladi. Tushum kelishigidagi to‘ldiruvchi doimo fe’l orqali ifodalangan kesimga bog‘lanadi. Solishtiring: olmaning bargi – olmani yedim.
Ona tili (8-sinf)
Bilib oling. Gapning biror bo‘lagini aniqlab kelgan ikkinchi darajali bo‘lak aniqlovchi deyiladi.
Aniqlovchi qanday? qaysi? nechanchi? qancha? nechta? kimning? nimaning? so‘roqlaridan biriga javob bo‘ladi. Aniqlovchi aniqlagan (bog‘langan) bo‘lak aniqlanmish hisoblanadi.
Aniqlovchi narsa-buyumning rang-tusi, mazasi, hajmi, kim yoki nimaga qarashliligini bildiradi.
Aniqlovchi ega, ot kesim, to‘ldiruvchi va holga bog‘lanadi: Bahaybat samolyot (ega) yerga ohista qo‘ndi. Salimjon – a’lochi o‘quvchi (ot kesim). Ilg‘or ishchilarga (to‘ldiruvchi) mukofotlar topshirildi. Mehnat faxriylari bilan yangi bog‘da (hol) uchrashdik.
Aniqlovchilarning bir xili narsa-buyumning belgisi (rangi, miqdori, mazasi, hajmi)ni bildirsa, boshqa xili narsa-buyumning kimga yoki nimaga qarashliligini bildiradi. Shunga ko‘ra, aniqlovchilar ikkiga bo‘linadi: 1) sifatlovchi aniqlovchi; 2) qaratqichli aniqlovchi. Misol: Yangi (sifatlovchi aniqlovchi) binolar qishloqning (qaratqichli aniqlovchi) husniga husn qo‘shmoqda. (Sh.R.)
Bilib oling. Gapda shaxs yoki narsa-buyumning belgi-xususiyati, hajmi, shakli, maza-ta’mi, rang-tusi, miqdori, tartibi kabi ma’nolarni anglatadigan aniqlovchi sifatlovchi aniqlovchi deyiladi. Sifatlovchi bog‘lanib kelgan so‘z sifatlanmish deb ataladi: Mustaqil O‘zbekiston, qizil gul, mohir qo‘llar, qo‘shni hovli, kuzgi bug‘doy, uzoqdagi do‘st, temir eshik kabi.
Sifatlovchi aniqlovchilar quyidagi so‘z turkumlari bilan ifodalanadi:
1) sifat bilan: Uning ziyrak qo‘ng‘ir ko‘zlarida horg‘inlik bor edi. (S.Anorboyev)
2) son bilan: Tepalikdagi chinor, ikki tup sadaqayrag‘och to‘rt-besh kishilik talay supalarga soya solib turardi. (A.Q.)
3) olmosh bilan: Qirlardan esayotgan mayin shabada ana shu ajoyib gullarning g‘unchalarini yozmoqda. (I. Rahim)
4) ot bilan: Kumush qishdan, zumrad bahordan, qolishmaydi kuzning ziynati. (U.)
5) ravish bilan: Uzoq-yaqin yerlardan odamlar yig‘ila boshladi. (O.)
6) sifatdosh bilan: Mayin esgan shabada ko‘nglimizni chog‘ qildi.
7) modal so‘z bilan: Zarur ishlarimizni bitirdik.
8) taqlidiy so‘z bilan: Zavodning mashina bo‘limidan gurs-gurs zarb uzluksiz eshitilib turardi. (O.)
Bilib oling. Sifatlovchi aniqlovchilar ba’zan o‘ziga qarashli so‘zlar bilan birikmali holda qo‘llanadi: Jamilovning egnida oq shohi kitel, sariq koverkot shim, oyog‘ida kavkazcha etik, boshida chust do‘ppi edi. (S.Anorboyev) Yuzida bilinar-bilinmas chechak o‘rni qolgan, keng peshanali, sochlarini o‘ng tomonga silliq taragan jurnalist shoirga bir qarab qo‘ydi. (S.Anorboyev)
Aniqlovchi vazifasida kelgan sifatdoshlar birikmali qo‘llanib, sifatdosh qurilmani hosil qiladi. Yuqorida keltirilgan so‘nggi misolda ikkita sifatdosh qurilma bor: yuzida bilinar-bilinmas chechak o‘rni qolgan, sochlarini o‘ng tomonga silliq taragan.
Bilib oling. Gapning biror shaxs yoki narsa-buyumga qarashliligini xosligini bildirgan bo‘lagi qaratqichli aniqlovchi deyiladi. Aniqlovchining bu turi qaratqich kelishigidagi so‘zlar bilan ifodalanadi. Qaratqichli aniqlovchilar tobelangan so‘z (bo‘lak) qaralmish hisoblanadi.
Qaratqich aniqlovchili so‘z birikmalarining asosiy belgisi hokim so‘zning egalik qo‘shimchalari bilan (ko‘pincha, III shaxs birlik sondagi –i, -si qo‘shimchasi bilan) kelishini talab qilishidadir: maktabimizning binosi, hunar maktabi.
Qaratqichli aniqlovchilar qaralmish bilan munosabatga kirishganda turlicha shakllanadi:
1) qaratqich va qaralmish belgili keladi (daraxtning bargi);
2) qaratqich belgisiz, qaralmish belgili keladi (direktor xonasi);
3) qaratqich va qaralmish belgisiz qo‘llanadi (o‘rik danak, yong‘oq mag‘iz). Ayrim vaqtda qaratqich belgili, qaralmish belgisiz kelishi ham mumkin (bizning qishloq).
Qaratqichli aniqlovchi quyidagi so‘z turkumlari bilan ifodalanadi:
1) ot bilan: Shiftga osig‘liq qirqinchi chiroqning qalpog‘i uy devorlarining tepa yog‘iga cho‘ziq soya solgan. (H.G‘.)
2) otlashgan sifat bilan: Yaxshining yaxshiligi tegar har yerda, yomonning yomonligi tegar tor yerda. (Maqol)
3) otlashgan son bilan: Birining ko‘zi qora, ikkinchisining ko‘zi ko‘k edi. O‘nning yarmi – besh.
4) olmosh bilan: Bizning eshon – kabobpazlarning piri. (A.Q.)
5) otlashgan sifatdosh bilan: So‘raganning bir yuzi qora, bermaganning ikki yuzi qora. (Maqol)
6) otlashgan undov, taqlid so‘zlar bilan: Bolalar qiy-chuvining ovozi shu yergacha yetib keldi.
Bilib oling. Izohlovchi aniqlovchining bir turi bo‘lib, u shaxs yoki narsani boshqacha nom bilan aniqlaydi.
Izohlovchilar ko‘pincha ot so‘zlar bilan ifodalanadi: muhandis Rustamov, usta Qodir, mayor Ahmedov, shoira Zulfiya kabi. Izohlovchi bog‘langan bo‘lak izohlanmish hisoblanadi.
Izohlanmish shaxsning millati, kasb-kori, nasl-nasabi, unvoni, laqabi, yoshi, qarindoshligi, jinsi va boshqa qo‘shimcha belgilarini tavsiflovchi bo‘lak izohlovchi deb yuritiladi:
1) unvon, amal: Kapitan Mansurov so‘zladi. Anjumanda direktor Xoliqov ham qatnashdi.
2) mashg‘ulot, kasb: Oshpaz Shukur, gulchi Nizom va duradgor Vahobjonlar yеtib kelishdi.
3) yosh, jins, qarindoshlik: O‘sha kuni Mavjuda xola bilan Sobir amaki foydali nasihatlar qildilar.
4) laqab: Jalil sovuq, Juman pismiqlarning askiyasini eshitdik.
5) taxallus: Muso Toshmuhammad o‘g‘li Oybek yirik nasriy asarlar muallifidir.
Do'stlaringiz bilan baham: |
