Bulardan tashqari, tovush o'zgarishlarining yana quyidagi ko’rinishlari mavjud

Bilib oling. Ish-harakatning qay tarzda bajarilganligini bildirib, qanday? qanday qilib? qanday ahvolda? kabi so‘roqlarga javob bo‘lgan hol ravish holi deyiladi. Misollar: “Volga” yangi asfalt yo‘lda tez yurib ketdi. Shoir shamning uchini avaylab kesdi. Siz indamay o‘tirar edingiz.
Ravish holi ravish, fe’l va ko‘makchili otlar bilan ifodalanadi.
Ravish holi kesimga bitishuv yo‘li bilan bog‘lanadi. Demak, u ko‘pincha o‘zi ergashgan so‘zdan oldin keladi.
Ish-harakatning miqdorini va darajasini bildirib, qancha? nechta? necha marta? qay darajada? so‘roqlaridan biriga javob bo‘lgan hol daraja-miqdor holi deyiladi.
Daraja-miqdor hollari sonlar bilan, miqdor ravishlari bilan, marta so‘zi qatnashgan birikmalar bilan ifodalanadi: Paxta to‘g‘risida ko‘p yozdi. (A.Q.) Shu gapni besh marta takrorladi.
Sabab holi va maqsad holi
Bilib oling. Ish-harakatning sababini bildirib, nimaga? nima uchun? nima sababdan? nima sababli? kabi so‘roqlarga javob bo‘lgan hol sabab holi deyiladi. Misollar: Tinchlik tufayli yurt obod. Yaxshi o‘qigani uchun u mukofotlandi. Qul Tarlon shodligidan To‘xtolmadi yig‘idan. (H.O.)
Sabab holi –lik, -sizlik qo‘shimchalarini olgan otlar –gani qo‘shimchali sifatdoshlar va sababli, uchun ko‘makchi qurilmalar bilan ifodalanadi. Ish-harakatning maqsadini bildirib, nima uchun? nima maqsadda? nima qilgani? kabi so‘roqlarga javob bo‘lgan hol maqsad holi deyiladi. Misollar: Qoratoy do‘stining dov-daragini surishtirish uchun yеlib-yugurdi. (O.) Bolalar o‘ynab kelgani ko‘chaga chiqib ketdi. (O.)
Maqsad holi maqsad ravishdoshlaridan, ot yoki fe’llardan keyin uchun, deb, maqsadida, maqsadi bilan kabi so‘zlarni keltirish orqali, shuningdek, jo‘nalish kelishigi qo‘shimchasini olgan harakat nomlari orqali ifodalanadi.
Esda saqlang. Gapning kesimidan anglashilgan harakatning belgisini bildiruvchi gap bo‘lagiga hol deyiladi. Hollar qanday? qanday qilib? qay holda? qachon (-gacha, -dan, -dan buyon,)? qayer (-da, -ga, -dan?), nima sababdan? nima maqsadda? kabi so‘roqqa javob bo‘ladi.