Бухоро давлат университети илм ва эзгулик бухоро – 2016

II. УСТОЗ – ОТАНГДЕК УЛУҒ


УСТОЗЛАРИМ – БАХТИМ МЕНИНГ


Ш.Р. Баротов

Устоз деган сўз ўзи жуда катта эҳтирос ва эътиқод билан айтиладиган илоҳий бир қалом бўлса керак. Чунки инсоннинг бахтиёр яшаш тарзи, тараққиётининг нечоғлик мазмундорлиги, айни пайтда инсонинг ўзлигини англаши ёхуд ўзлигини йўқотмаслигини унинг нафақат ота-онасига, балки устозига хам кўп жихатдан боғлиқ деб ўйлайман. Шунинг учун айтсалар керак: устоз кўрмаган шогирд мақомга йўрғалар. Дарҳақиқат, устоз кўрган устозининг ҳар қандай ҳолатда ҳам ҳурмат-иззатини ўз ўрнига қўя билган одамгина бу ҳаётда жуда кўп эзгу ишларни қила олади, омади чопади ва жуда кўп ютуқларга эриша олади. Менинг ҳам бахтим шундаки, устозларимдан жуда кўп нарсаларни ўргандим, ҳамиша уларга ҳавас қилдим, ҳамиша уларга юксак эътиқод қўйдим, уларни ардоқладим, ҳозир ҳам барча устозларимдан чексиз миннатдорман. Аслида устозларим жуда ҳам кўп. Барчаларининг ҳам ўз ўринлари ва салоҳиятлари бор. Барча устозларимнинг ҳарматларини ўз ўрнига сақлаган ҳолда улардан айримлари ҳақида қисқача маълумот беришим мумкин.

Мактабдаги устозларим: бошланғич синфдаги менга илк алифбони ўргатган устозларим Раҳматова Дилором (1синф), Халилова Муборак (2-4-синф), юқори синфлардаги устозларим (синф раҳбарим Дилбар Исломовна Исломова), Барот Лўндаевич Тўраев– тарих фани ўқитувчиси, Жўрақул Рўзиевич Рўзиев -география фани ўқитувчиси, Шариф Бектошевич Бектошев - адабиёт фани ўқитувчиси. Мактаб директори Аскар Жўраев ва ҳоказоларнинг барчаларидан илк таълим сирларини, ҳаёт фалсафасини ва илк ватанпарварлик намуналарини ўрганиб, ҳозиргача шу фундаментал билимлар асосида ҳаётга интилиб келаётганлигимдан жуда бахтиёрман.
Бу устозларимнинг барчалари билан ҳозир ҳам тез-тез учрашаман, ҳар сафар уларни кўрганимда улардаги менга бўлган беғуборлик, бағрикенглик, шогирдпарварлик, муносабатларидан қувонаман, уларнинг самимий дуолари, пурмаъно ўгит-насиҳатлари мени ўз оғушига олиб, юксак-юксак ҳаётий чўкқиларга чорлайверади.