Бухоро давлат университети илм ва эзгулик бухоро – 2016

Бешинчидан, Ш.Р.Баротов дарслик, ўқув қўлланма, монографияларни моҳирона ёза оладиган олим. Жумладан, таълимда психологик хизмат (монография), 2013 йилда чоп этилган “Очиқ ахборот тизимларида ахборот-психологик хавфсизлик” (ҳаммуаллифликда) дарслиги, “Кичик ёшдаги ўқувчилар фаолиятини баҳолаш” (“Ўқитувчи” – 1992), “Ўқувчи шахсини ўрганиш усуллари” (“Ўқитувчи” – 1995), “Умумий психология” (“Бухоро” – 2000), “Психологиядан изоҳли луғат” (“Фан” – 2008), “Экспериментал психология” (“Фан -2008), (“Менталитет психология­си” (“Фан” – 2009), “Жаҳон психологлари” (“Маънавият” – 2012) каби ўқув, ўқув–услубий қўлланмалар, монографиялар устоз ижодининг намуналаридир.
Олтинчидан, Ш.Р.Баротов нафақат олим балки қатъиятли раҳбар ҳам. Дастлаб, Шариф Рамазонович университетнинг педагогика ва психология кафедраси мудири (1997-1999; 2000-2002; 2005-2011, 2016), илмий ишлар бўйича проректор (1999-2000), Республика маънавият ва маърифат маркази Бухоро вилояти бўлимининг раҳбари лавозимларида ишлади. 2011 йилдан бошлаб, педагогика факультети декани лавозимида меҳнат қилмоқда.
Еттинчидан, 2016 йил март ойида Бухоро давлат университети (1992 йилгача Бухоро давлат педагогика институти)нинг ташкил этилганига 85 йил тўлиши муносабати билан юбилей тантаналари, жумладан, ўтган йиллар ва ҳозирда фаолият кўрсатган илмий мактаблар, уларнинг ташкилотчилари тўғрисида “Университет тарихи” китобларини нашр эттирилди. Мазкур рисола ушбу китобларнинг давоми ҳисобланади.
Бугунги кунда Ш.Р.Баротов раҳбарлигида психология илмий мактаби фаолият кўрсатмоқда. Маълумки, академия, илмий марказ, жамиятлар одатда олий ўқув юртлари бағрида шаклланган. Тўла шаклланган илмий мактаб тамойил-талабларига кўра илмий мактабнинг асосчиси иқтидорли, ташкилотчи, инсонпарвар ва янгиликка интилувчан бўлиши шарт. Ш.Р.Баротовнинг психология мактабида 4 та фан номзоди, магистратура, илмий журнал фаолият олиб бормоқда. Мазкур илмий мактабнинг ютуғи сифатида профессор Шариф Баротовга Халқаро Психология Фанлари академиясининг академиги илмий унвонининг берилиши ҳамда унинг шу ну­фуз­ли академияси таъсис этган “Человеческий фактор” медали билан тақдирланиши каби ёрқин мисоллар ҳам гувоҳлик бера олади.