Бухгалтерия ҳисоби фани бўйича маъруза матни 3-мавзу

Бухгалтерия ҳисоби фани бўйича
МАЪРУЗА МАТНИ
3-мавзу.
Режа:

1. 
   Бухгалтерия ҳисоби фанининг предмети ва усуллари
   
2. 
   Асосий воситалар ва номоддий активлар ҳисоби
   
3. 
   Инвестициялар ҳисоби
   
4. 
   Товар-моддий захиралар ҳисоби
   
5. 
   Меҳнат ва унга ҳақ тўлаш ҳисоби
   

1. Бухгалтерия ҳисоби фанининг предмети ва усуллари
1.1. Хўжалик ҳисоби тушунчаси ва унга қўйилган талаблар.
Иқтисодий субъект фаолиятига раҳбарлик қилиш ва унинг устидан назорат ишларини олиб бориш учун раҳбариятни керакли маълумотлар билан таъминланиши зарур. Бунинг учун корхонанинг хўжалик фаолиятини узлуксиз кузатиб борилади. Кузатиш йўли билан олинган маълумотлар маълум миқдор кўрсаткичларида ифодаланиб, исталган вақтда фойдалана олиш учун уларга ўзига хос тартибда қайд қилинади. Корхонанинг молия - хўжалик фаолиятида юз берадиган айрим воқеа ва ҳосидаларни кузатиш, ўлчаш ва қайд қилиш унинг фаолиятини миқдорларда акс эттиришдан иборатдир. Демак, хўжалик фаолиятидаги ҳодисаларни ва воқеаларни кузатиш, ўлчаш ва қайд қилиш хўжалик ҳисобининг асосий мазмуни ташкил қилади.
Хўжалик ҳисобига бўлган талаб, унинг мазмуни ва мақсади барча ижтимоий-иқтисодий формация (тузум)ларда ҳам бир хил бўлмаган, улар ҳар бир янги ижтимоий тузум талабларига бўйсиндирилиши натижасида доимо ўзгариб келган.
Хўжалик ҳисоби ёрдамида иқтисодий субъектда юз берадиган айрим воқеа ва ҳодисалар фақат миқдор жиҳатидан эмас, балки сифат жиҳатидан ҳам ифодаланади. Демак, хўжалик ҳисоби иқтисодий субъектга раҳбарлик қилиш, унинг устидан назорат қилиш мақсадида корхонада юз берадиган ўзгаришларни миқдорларда акс эттириш ва сифат жиҳатидан тавсифлашдан иборатдир.
Хўжалик ҳисоби корхоналарга бириктирилган моддий ва молиявий ресурсларнинг ҳаракати ва ҳолатини акс эттириш билан бирга улардан оқилона, самарали фойдаланиш устидан назорат олиб боради, шунингдек, республиканинг миллий бойлигини сақлаш ҳамда кўпайтиришга ҳисса қўшади.