Bolalar rivojlanishidagi nuksonlarning klinik asoslari

O‘RTA QULOQ KASALLIKLARI
O‘tkir kataral otit o‘rta quloq yallig‘lanishiga sabab bo‘ladigan mikroflora kokklardan iborat (strepto-kokk, stafilo-kokk, pnev-mokokk). Kasallik, eshituv nayi shilliq qavatining yallig‘lanishi natijasida, eshituv nayining torayishi va berkilishiga olib keladi, chunki shilliq qavatdagi bezlarning shira chiqarishi ko‘payib, nog‘ora bo‘shlig‘ida suyuqlik yig‘iladi. Bunda bemorning ahvoli aytarli o‘zgarmaydi, quloqda og‘riq sezilmaydi. U faqatgina quloq bitishidan, eshitish qobiliyati pasayganidan, ozgina shovqindan va o‘z ovozini kasal quloqda ko‘proq eshitishidan shikoyat qiladi. Bemorning qulog‘i tekshirilganda quloq parda ichkari tomon tortilgan bo‘lib, uning rangi bir oz sarg‘ish yoki ko‘kimtir holatda bo‘ladi. Ba’zan nog‘ora bo‘shlig‘idagi suyuqlik sathini quloq pardadan ko‘rish mumkin. Agar kataral otitni o‘z vaqtida davolanmasa yiringli otitga aylanishi mumkin.
Davolash: bemorga og‘riq qoldiruvchi, isitma tushiruvchi, shishga qarshi, antigistamin dori moddalar, keng qamrovli antibiotiklar, burun bo‘shlig‘iga tomirlarni toraytiruvchi suyuqliklar tomizish buyuriladi. Fizioterapevtik muolajalar ham tavsiya etiladi. Jumladan, isituvchi kompress yaxshi natija beradi. Quloq sohasiga qo‘yilgan kompress og‘riqni qoldiruvchi va isituvchi ta’sir ko‘rsatadi, uni yiringli yallig‘lanish alomatlari yo‘qligida qo‘llash mumkin. Isituvchi kompress qo‘yish texnikasi: 4 qavat qilib taxlangan doka va kompress uchun maxsus qog‘oz olinib uni qaychi bilan qirqib quloq suprasi uchun teshik ochiladi.Bu qog‘ozning o‘lchami dokadan kattaroq bo‘lishi kerak. Dokani teng nisbatda suv bilan aralashtirilgan spirtda namlab, siqib olinadi va uni quloq sohasiga qo‘yiladi, so‘ng uning ustidan maxsus kompress qog‘oz qo‘yiladi. Ularning ustidan paxta bo‘lagi yopilib bint bilan bog‘lanadi. Kompress 6–8 soatdan so‘ng olinib, teri quruq qilib artiladi va quruq bog‘lam qo‘yiladi.
O‘tkir yiringli otit
Yiringli otit uch bosqichda o‘tadi.