Бобир Исмоилов

Мустақил фарзанд

«Артистлар билан тирикчилик қиляпман, Санъат ва маданият институтига топширсаммикин, аммо дадам қаршилар», деб, танишим 1999 йилда маслаҳат сўраганди. Ўшанда топширавер, дегандим. Лекин отасига қарши боролмай, санъат ўқув юртига кирмади. Ҳозир эса, барибир, тирикчилиги санъаткорлар билан.

Университетда дарс бериб юрганда, ҳар хил студентларни кўрасан. Европотокда Ислом исмли йигит ўқирди. Ўзи яхши йигит. Озроқ эркатой, шўхроқ эди. Лекин, умуман олганда, тарбия кўрган. Шу студентни кўриб, эзилардим. Жойини топа олмагандек. Отаси юрист бўласан, деб, ўқитяпти. Лекин йигитда қизиқиш йўқ. Калласи ишлайди, лекин ўз жойида эмас. Кимнингдир орзу-ҳавасини амалга ошириш мақсадида, зўр-зўраки ўқияпти. Ғайрати кўп – билмадим, десант қилиб, бошқа ўлкаларга ташлаш керакми, жангга қўйиб юбориш керакми, шимолий қутбни забт этиши лозиммикин, лекин ҳозирги аҳволда бола қийналяпти. Минг зўр жойда ўқигани билан, ҳаёт фақат престиж, фақат обрў, пулдан иборат эмас. Болани мажбурлаб, «рамкага» солиш шартмикин, деб қоламан.
Фарзандларга қадам босишни ўргатиб, ўзимиз четга чиқишимиз лозим. Бола телевизор эмас, узоқдан, пультдан бошқариш мумкин бўлса. Ўзимизнинг орзу-умидимизни фарзандларда амалга оширмоқчи бўламиз. Тақдирини ҳал қилмоқчи бўламиз, лекин чеклаб қўйганимизни ўзимиз билмаймиз.
Ўзбек оиласи, сулоласи бу фабрика. Агар тўғри ташкил топган бўлса, жуда яхши «маҳсулот» чиқара олади. Гоҳида акаларим сўрайди, сен у-бу нарсани қатдан биласан, деб. Мен ҳақлигимни аниқ билмайман, лекин итга ўхшаб ҳақлигимни ҳис қиламан – оилам, тарбиям, кўрган меҳрим, даккилар, еган қази-қартам мени шу кунгача шу синов учун тайёрлади. Кейин, қайсидир китобни ўқиб, қайсидир устозни кўриб, 40 ёшимда 15 ё 20 йил олдин қилган ишим тўғрилигига иқрор бўлганман, лекин ўшангача кимдир мени етиштирган-ку. Нимага мен ўзимга, ҳис туйғуларимга ишонмаслигим керак? Ҳудди шундай, ёшларимизга ҳам тўғри тарбия берайлик, ўзимиз ўрнак бўлайлик-да, ўйинга қўйиб юборайлик. Ҳеч қайси хатолар кечириб бўлмас даражада бўлмайди.
Оқ-қорани ажратишни ўргатиб, қолганига қўйиб бериш лозим, болаларга фитрати ва ғайратига мос иш топиб бериш керак.