Bino va inshootlar qurilishi

Polning asosini tayyorlash va linoleum yopishtirish ishlari texnologiyasi
Linoleum gilamlari polga mahkamlanmasdan, quruq asosga yoziladi. Linoleum pollari uchun tayyorlangan asos tekis, quruq, mustahkam, titramaydigan, cho‘kmaydigan, yoriqlarsiz bo‘lishi va changlardan tozalangan bo‘lishi kerak.
Agar pol asosida chuqurchalar, do‘ngliklar mavjud bo‘lsa, toshchalar, yirik qum donalari qoldirilsa, ulardan linoleum sirtida turli nuqsonlar paydo bo‘ladi va uning tezda yemirilishi, ishdan chiqishiga va yaroqsizholga kelib qolishiga sabab bo‘ladi. Payvandlangan linoleum gilamlari yotqiziluvchi asosning namligi 8%dan ortiq bo‘lmasligi kerak. Namlikning ko‘rsatilgan miqdordan ortiq bo‘lishi pol sirtida ko‘tarilishlar, ko‘pchishlar paydo bo‘lishiga, linoleumning mato asosining chirishiga, tayyorlov qatlamining buzilishiga olib keladi. Linoleum gilamlari tekislanishi uchun ular yozib qo‘yilgan xonalardagi namlik 60%dan oshmasligi kerak. Pol asosining yuk ko‘tarish qobiliyati 10 MPa dan kam bo‘lmasligi kerak. Linoleum gilamlari barcha turlardagi pardoz ishlari tugallangandan so‘ng yoziladi, bunda pol sirtining namlanishi va ifloslanishining oldi olinadi.
Linoleum gilamlari yotqiziladigan joylariga gorizontal holda olib borilishi lozim, agar ularning o‘lchamlari bunga imkoniyat bermasa, ma’lum burchak ostida olib borilishi mumkin. Shuningdek, linoleum o‘ramlari kran yordamida derazalardan xonalarga uzatilishiga ruxsat beriladi.
Tozalangan, quruq asosga yozib qo‘yilgan linoleum gilamlari erkin holatda 1-2 sutka davomida saqlanadi.
Agar linoleum gilamlarining harorati +10⁰Sdan kam bo‘lsa, ular dastlab harorati +15⁰Sdan kam bo‘lmagan xonalarda 2 sutka davomida saqlanadi, shundan so‘ng yoziladi. Linoleum gilamlari yozilib, tekislangandan so‘ng ular xonaning o‘lchamlariga mos holda konturi bo‘yicha kesiladi.
Kesish shunday bajarilishi lozimki, devor bilan gilam qirrasi orasidagi tirqish 10mmdan ortiq bo‘lmasligi ta’minlansin.
Ushbu ishlar bajarilgandan so‘ng, linoleum gilamlari plintuslar qoqilib, qistirish reykalari yordamida mahkamlab qo‘yiladi.