Bino va inshootlar qurilishi

Keramik sopol plitkalarni hosil qilish texnologiyasi
Plitkalarni yuzaga yopishtirishdan avval asos qurilish ahlatlaridan tozalanadi va tozalangan asosga suv sochib, namlab olinadi.
Plitkalar tamg‘asi M-150 qorishma bilan yopishtirib olinadi. Qorishma qo‘zgaluvchanligi standart konusning botishi 3-4sm ga teng bo‘lishi zarur. Yuqoridagi qo‘zgaluvchanlikdagi qorishmani olish uchun qorishma tarkibiga syement massasining 0,2 qismini tashkil etuvchi PVA emulsiyasi qo‘shiladi. Plitkalar o‘rnatish uchun qorishma qalinligi 10-20mm atrofida (pol natekisligini inobatga olib) bo‘lishi zurur.
Plitkalarni o‘rnatish ishlari nishon plitkalari xonaning to‘rt burchagiga o‘rnatib olingandan keyin boshlanadi. Nishonlar quyidagilardan iborat: Reper nishon qatori, u devordan ma’lum masofa qochirib o‘rnatiladi. Nishon qatori ustki sathi toza pol sathini berishi kerak.
Friz – burchak chiziqlari bo‘ylab o‘rnaydi. Agar friz qatori oralig‘i 2m dan katta bo‘lsa, u holda oraliq friz qatori ham o‘rnatiladi.
Friz qatorlari o‘rnatib bo‘lingach, unga parallel ip tortilib, eni 800-1000 mm enlikda qorishma tortib olinadi. Bunda shunga ahamiyat berish kerakki, qorishma qalinligi 20mm dan ortib ketmasin. Qorishma sathi loyihaviy sathdan 2-3mm baland bo‘lishiga erishish zarur, ya’ni plitka qorishmaga o‘rnatilganda botishi natijasida kerakli sath ta’minlansin. Yuqoridagi endagi bo‘ylama qator o‘rnatib bo‘lingach, ustiga uzunligi 800-1000mm bo‘lgan taxta qo‘yib, bolg‘acha bilan urib plitkalar loyiha holatiga o‘rnatiladi.
Plitkalar o‘rnatib bo‘lingach yoz kunlarida uning sathiga qalinligi 5-10mm bo‘lgan to‘pon (yog‘och qipig‘i) yoziladi va 2-3 sutka davomida kuniga kamida 2 marta suv sochilib, namlab turiladi.
Plintuslar ikki xil usulda o‘rnatiladi: quyma yoki tayyor quyib, qotirilgan plintuslar. Quyma plintuslarni quyishda pol yetarli mustahkamlik olib bo‘lgach bino burchagi, ya’ni plintus o‘rnatiladigan joy to‘pondan tozalanadi va kelma yordamida burchaklarga qorishma to‘ldiriladi.
Plintus shaklini berish uchun maxsus shablon bo‘lib, u polga o‘rnagan reyka va devor bo‘ylab xarakatlantirish natijasida erishiladi.
Yig‘ma plintuslar esa burchakga M-150 tamg‘ali qorishmani 5-8mm qalinlikda yozib olinadi va unga o‘rnatiladi. Plintus to‘g‘ri o‘rnashini ta’minlash uchun devorga ip tortib olinadi va u yordamida gorizontalligi ta’minlanadi.
Plintuslar o‘rnatib bo‘lingach, atrofiga to‘pon sochilib, u namlanadi. Sepilgan to‘pon va uning namlanadi. Sepilgan to‘pon va uning namlanishi ortiqcha qorishmalarni o‘ta qotib ketishi oldini oladi.
Plitka va plintus yetarli mustahkamligini olgach, to‘ponga nam holga kelgunga qadar suv sepilib, u yordamida plitka va plintus ustini ishqalash orqali pol tozalanadi.
Pol tiniqligini ta’minlash uchun suvga nashatir spirti aralashtirib, 3-5% li eritma hosil qilib artish orqali plita tozalanadi va tiniqlik beriladi. So‘ngra yuza toza suv bilan ma’lum bir qalinlikda o‘rnagan pol yuzasidan oqib, kanalizasiyaga tushirib yuboriladi.