Berdaq atinda

Jeke maǵlıwmatnama - mekemeler tárepinen puqaralardıń turmısı hám jumıs sharayatındaǵı kóplegen waqıya hám hádiyselerdi, basqa da jaǵdaylardı tastıyıqlap beretuǵın hám talap etilgen orınlarǵa kórsetiletuǵın jazba rásmiy hújjet. Máselen, mekeme xızmetkerge onıń qay jerde, kim bolıp hám qansha aylıq alıp isleytuǵını haqqında, oqıwshı hám studentlerge qay jerde oqıp atırǵanı haqqında~ puqaralardıń hal-jaǵdayın xatlaw (ZAGS) hám notarial keńseleri hám puqaralar jıyınları baslıqları qanday da bir adamnıń tuwılǵanlıǵı yaki qaytıs bolǵanlıǵı tuwralı, nekeden ótkenligi yamasa ajırasqanlıǵı haqqında (hújjetler joǵalıp qalǵanda), rayonlıq hám qalalıq social-támiynat bolimi jumısshı yaki xızmetkerlerdiń mayıp bolıp qalǵanlıǵı, napaqasınıń muǵdarı, avtomashinası joq ekenligi haqqında, emlew mekemeleri adamnıń densawlıǵı haqqında, úy-jay basqarmaları adamnıń jasap turǵan ornı, iyelep turǵan úy-jayınıń maydan kólemi yaki shańaraq aǵzalarınıń sanı haqqında maǵlıwmatlar beredi.
Jeke maǵlıwmatnamalar, kópshilik jaǵdaylarda, arnawlı baspa is qaǵazlarında jazıladı. Jeke maǵlıwmatnamalarda ol jiberilgen mekemeniń yaki jeke adamnıń atı bolmaydı. Baspa is qaǵazları bolmaǵan jaǵdaylarda maǵlıwmatnamalar ápiwayı qaǵazǵa qoldan yaki jazıw mashinasında jazıladı hám onıń shep múyeshinde kárxana yaki jámáát shólkeminiń tórt múyeshli móri basıladı, onıń qarsısında oń tárepinde «Maǵlıwmatnama» sózi jazıladı.
Jeke maǵlıwmatnamalar tómendegidey zárúriy bólimlerden turadı
1. Maǵlıwmatnamanı beriwshi shólkemniń atı.
2. Maǵlıwmatnamanıń qatar sanı hám berilgen sánesi.
3. Hújjet túriniń atı (Maǵlıwmatnama).
4. Maǵlıwmatnama berilip atırǵan jeke adamnıń ismi, ákesiniń atı hám familiyası.
5. Maǵlıwmatnama teksti.
6. Maǵlıwmatnamanıń maqseti (maǵlıwmatnama kórsetiletuǵın, tapsırılatuǵın orınnıń atı).
7. Hámeldar (basshı) adamnıń qolı (lawazımı hám familiyası)
8. Mór.

Úlgi	Ózbekistan Respublikası Ilimler Akademiyasınıń Qaraqalpaqstan bólimi kitapxanasınıń

Maǵlıwmatnaması
Turǵanbay Abdimuratov kitapxanadan alǵan barlıq kitaplardı tapsırdı, házir onıń kitapxanadan qarızı joq.
Abonent bólimi baslıǵı (qolı) (familiyası)
(mór) 2001-jıl 5-dekabr


Daǵaza - kópshilikti yamasa belgili topardaǵı adamlardı jaqın arada bolatuǵın ilajlar, májilis, ushırasıw, gúrrińlesiw, sonday-aq jumısqa, oqıwǵa qabıl etiw hám basqalar haqqında xabardar etiw ushın jazba túrdegi málimleme. Daǵazanıń zárúrli bólimleri
1. Málimlemeniń atı (Daǵaza).
2. Daǵaza etilip atırǵan ilajlardıń ótkeriliw waqtı, ornı.
3. Ótkeriletuǵın ilajdıń mazmunın sáwlelendiriwshi tekst.
4. Ilajdı ótkeriwshilerdiń atı (ádette, ótkeriliwi tiyis ilajdı daǵazalap atırǵan shólkemniń, organnıń atı «Kásiplik awqam», «Kamolot», «Shólkemlestiriw komiteti», «Jazıwshılar awqamı», «Rektorat», «Dekanat» túrinde beriledi).


Úlgi
Berdaq atındaǵı Qaraqalpaq mámleketlik universiteti bosap qalǵan shet tilleri kafedrasınıń baslıǵınıń lawazımına tańlaw (konkurs) daǵazalaydı.
Tańlaw múddeti - 20-iyunge shekem.
Hújjetler tańlaw haqqındaǵı nızamǵa muwapıq tómendegi mákan jayǵa jiberiledi Nókis qalası, 15-baylanıs bólimi, Berdaq atındaǵı Qaraqalpaq mámleketlik universiteti.