Учинчидан, кредитдан фойдаланганлиги учун мижоз тўлайдиган солиқларни аниқлашга
катта эътибор бериш керак. Баъзан бу масалалар жуда муҳим ҳисобланганлиги боис улар
“Терм Шеет” таркибига киритилади.
Кредит шартномасининг якуний вариантини ишлаб чиқиш ва имзолаш фақатгина
етакчи банк ва иштирокчи банклар ўртасида мазкур инвестиция лойиҳасини биргаликда
кредитлаш тўғрисида ўзаро келишув тузилгандан кейин амалга оширилади. Лойиҳавий
молиялаштиришда турли инвестор ва кредиторларнинг маблағлари
иштирок этиши
мумкин, яъни маблағларнинг синдикатлашуви рўй беради. Шу жиҳатдан ҳам лойиҳавий
молиялаштиришни синдикатлашган кредитлаштириш деб аташимиз ҳам мумкин. Ҳозирда
еврокредит бозорида ҳаракат қилувчи банк синдикат ва консорциумларининг
лойиҳаларни молиялаштиришдаги роли кундан кунга ўсиб бормоқда. Республикамизда
инвестиция лойиҳаларини молиялаштиришда ҳам еврокредитлар ва бошқа ривожланган
чет давлат банкларининг кредитлари, хорижий инвесторларнинг маблағлари, республика
акционер тижорат ва хусусий банкларининг кредитлари иштирок этмоқда.
Ривожланаётган давлатларда лойиҳавий молиялаштириш ўз
хусусиятига эга, яъни
кўп ҳолларда улар концессия шартномасига асосланади. Бу шартноманининг мазмуни
шундан иборатки концессионер (лойиҳачи компания) келишилган давр мобайнида (20, 30
ва ундан ортиқ йилларга) инвестиция фаолиятининг объектини қуриш, молиялаштириш,
бошқариш ва хизматини ташкил этиш билан боғлиқ жавобгарликни ўз зиммасига олади.
Сўнг эса объект давлатга (давлат корхонаси) топширилади. Концессия даврида
концессионер объектдан
фойдаланиб даромад олади, инвестиция лойиҳасини
молиялаштириш бўйича харажатларини қоплайди. Лойиҳаларни молиялаштиришнинг
бундай усули сўнги вақтларда саноати ривожланган давлатларда ҳам кўп
инфраструктурали лойиҳаларни молиялаштириш схемасининг таркибий қисми
ҳисобланади.
Лойиҳавий молиялаштириш тўғрисида фикримизга якун ясаб қуйидагиларни қайд
этишимиз мумкин:
-
лойиҳавий молиялаштиришнинг асосий тури бу
-
синдикатлашган
кредитлаштириш бўлиб, унда турли инвестор ва кредиторлар ўз риски ва маблағлари
билан иштирок этади;
- лойиҳавий молиялаштиришнинг жаҳон амалиётида турлича усуллари ва манбалари
мавжуд бўлиб, ҳар бир давлат ўз иқтисодий ва инвестицион сиёсати,
бозор
механизмининг амал қилиш даражасига қараб бу усуллардан фойдаланиши мумкин;
- лойиҳавий молиялаштириш объекти бўлиб аниқ мақсадни кўзлаган, иқтисодий ва
молиявий жиҳатдан самарали бўлиши режалаштирилган лойиҳалар ҳисобланади;
- лойиҳавий молиялаштиришда энг асосий жараён бу лойиҳа ҳужжатларининг
техник, иқтисодий, молиявий, экологик таҳлили ҳисобланиб, бу жараённинг қанчалик
чуқур ва савияли ўтказилиши лойиҳанинг келгуси тақдирини белгилаб беради.