Baliq kasalliklari fanidan ma’ruzalar to’plami termiz- 2021

Serbar (keng lentali) gijja (Diphyllobothrium latum) asosiy xo’jayini odamlarning ichagida parazitlik qiladi. Lekin ular itlarda, mushuklarda, tulkilarda va baliq go’shtini yeydigan boshqa hayvonlarda ham bo’lishi mumkin. Tanasining uzunligi 10-15 m gacha yetadi. Bosh qismi-yopishish organi botriyalardan ibrat. Serbar gijjaning keyingi qismidan uzilib tashqariga chiqqan bo’g’inlardagi tuxumlardan suvda koratsidiyalar rivojlanadi. Ularning usti kiprikchalar bilan qoplangan, unda olti ilmoqchali onkosfera rivojlanadi. Bu lichinkalarni birinchi oraliq xo’jayini bo’lgan tsikloplar yutadi. TSikloplarning tanasida onkosfera ikkinchi lichinkalik davri-protserkoidga aylanadi. U uzunchok shaklda bo’lib, tanasining keyingi uchida ilmoqchalarga ega bo’lgan doirasimon yopishish organi — tserkomeri bor. Protserkoid tsiklop tanasida parazitlik qilish davrida uni tsiklop bilan birga olabuga, churton, nalim kabi baliqlar yutadi. Baliklarning ichagi orqali protserkoid ularning jigariga va muskullariga o’tib, u yerda uchinchi lichinka davri plerotserkoidga aylanadi. Uning chuvalchangsimon tanasi 6 mm uzunlikda bo’lib, aniq rivojlanmagan bosh qismining yon tomonida botriyalar bo’ladi. Plerotserkoidning keyingi rivojlanishi uchun u oxirgi xo’jayini odamlar, itlar, tulkilar va mushuklarga baliq go’shtini iste’mol qilish orqali o’tadi. Odamlarning ichak devoriga yopishib olib, bo’yin qismidan yosh bo’g’inlar hosil kila boshlaydi va 10—15 m uzunlikdagi tasmasimon chuvalchangga aylanadi.