Atv baholash

Muammoning o‘rganilganlik darajasi. Mulk qiymatini, jumladan qurilish mashinalari qiymatini baholash muammolari milliy va xorijiy olimlar hamda mutaxassis-tadqiqotchilar tomonidan keng o‘rganilmoqda.
Xorijiy olimlar Dj.Fishmen, Sh.P.Pratt, K.Griffit, K.Uilson, Z. Merser, T. Xarmslarning² ishlarida avtotransport vositalari, jumladan qurilish mashinalarini baholash biznesni baholashning alohida bo‘limi sifatida tadqiq qilingan, lekin qiymat ekspertizasining alohida yo‘nalishi sifatida qarab chiqilmagan.
Rossiyalik olimlar Yu.V.Andrianov, V.P.Antonov, E.V.Antonova, A.P.Kovalev, A.A.Kushel, M.A.Fedotova, B.E.Lujanskiy, V.S.Xomyakov, I.V.Korolev, S.M.Chemerikin, S.K.Shamishev, R.G.Shaulova, A. N. Asaul, V. N. Starinskiy, A. G. Bezdudnayalar³ mashina va uskunalarni baholashni o‘rganishgan, qurilish mashinalarini baholash esa bu yo‘nalishning bir qismi hisoblanadi, ammo qurilish mashinalarini baholashning o‘ziga xos tomonlari ushbu olimlar ishlarida chuqur o‘rganilmagan.
Milliy iqtisodchi olimlarimizdan B.Xodiyev, B.Berkinov, A.Kravchenko, R.T.Tursunov, N.T.Po‘latov, K.B.Ganiyev, G.I.Ganiyeva, F.K.Ganiyeva, N.J.Tuychiyev, G.A.Nigmanova, Sh.Sh.Shoxa’zamiy va boshqa olimlarning⁴ tadqiqotlari va ilmiy izlanishlarida avtotransport vositalarini, xususan qurilish mashinalarini baholashga oid muhim masalalar tadqiq qilingan. Ushbu olimlarning ilmiy adabiyotlarida mulk, biznesni baholashning nazariy va uslubiy jihatlari yoritilgan.
Ammo mulk sifatida qurilish mashinalari o‘ziga xos tomonlarga ega va baholash jarayonida uning bu xususiyatlari birlamchi omil sifatida qaraladi. Shu sababli zamonaviy bozor iqtisodiyoti sharoitida qurilish mashinalarining shaffof, haqqoniy, adolatli qiymatini aniqlash bugungi kunda dolzarb masalalardan biri bo‘lib qolmoqda. Shu bilan birga mamlakatimizda bu muammo bo‘yicha chuqur ilmiy izlanishlar olib borilmagan va iqtisodiy adabiyotlarda yoritilmagan. Yuqorida keltirilgan dalillar mazkur tadqiqot yo‘nalishlarini belgilashda asos bo‘lib xizmat qiladi.