Асосий конституциявий янгиликларнинг мазмуни ва моҳияти

5.9. Конституциявий суднинг ваколатига таллуқли масалалар доираси кенгайтирилмоқда ва аниқлаштирилмоқда, унинг судьялари фаолиятининг кафолатлари кучайтирилмоқда.
Киритилаётган тузатишлар:
а) Конституциявий суд (133-модда):
– Ўзбекистон Республикаси халқаро шартномаларининг Ўзбекистон Республикаси Конституциясига мувофиқлигини аниқлаши – уларнинг ратификацияси тўғрсидаги қонунлар Ўзбекистон Республикаси Президенти томонидан имзоланишидан аввал;
Маълумот учун: амалдаги тартиб Конституциявий суд томонидан фақатгина Ўзбекистон Республикаси халқаро шартномаларини ратификация қилиш тўғрисидаги қонунларнинг Ўзбекистон Республикаси Конституциясига мувофиқлигини аниқлашни назарда тутади.
– референдумга қўйилаётган масалаларнинг Ўзбекистон Республикаси Конституциясига мувофиқлиги тўғрисида хулоса бериши белгиланмоқда.
Конституциявий суднинг шундай ваколатлари Беларусь, Россия ва бошқа мамлакатлар конституцияларида мавжуд.
б) Конституциявий суд судьялари ўн йиллик муддатга қайта сайланиш ҳуқуқисиз сайланади (132-модда).
Маълумот учун: Конституциявий суд судьясининг қайта сайланиш имкониятисиз давомий ваколат муддати қатор хорижий мамлакатлар конституцияларида мустаҳкамланган. Масалан, 9 йиллик муддатлар: Болгария, Франция, Италия, Литва (ваколат муддати тугаганидан кейинги танаффусдан сўнг қайта сайланиш имконияти билан), Польша, Португалия, Руминия, Словения, Украина; 10 йиллик муддат: Грузия;
12 йиллик муддат: Германия, Россия.
5.10. Конституцияга адвокатура институтига бағишланган ва адвокатлар фаолиятининг кафолатларини мустаҳкамловчи алоҳида боб киритилмоқда (ХХIV боб).
Киритилаётган тузатишлар:
– адвокатура фаолияти қонунийлик, мустақиллик ва ўзини ўзи бошқариш принципларига асосланади;
– адвокатнинг ўз касбий мажбуриятларини бажаришдаги фаолиятига аралашишга йўл қўйилмайди;
– адвокатга ўз ҳимояси остидаги шахс билан тўсқинликсиз
ва махфийлиги таъминланган учрашув, маслаҳатлашув учун шароитлар яратилади;
– адвокат ва унинг касбий фаолияти давлат ҳимоясидадир. Адвокатнинг касбга оид ҳуқуқлари, шаъни ва қадр-қиммати қонун билан қўриқланади
(142-модда).