Асосий конституциявий янгиликларнинг мазмуни ва моҳияти

4.7. Илк маротаба шаҳарсозлик фаолияти соҳасида жамоатчилик назоратини амалга ошириш тўғрисида норма киритилмоқда.
Қуйидагилар белгиланмоқда:
– давлат фуқароларнинг экологик ҳуқуқларини таъминлаш ҳамда атроф-муҳитга зарарли таъсирини олдини олиш мақсадида шаҳарсозлик фаолияти соҳасида жамоатчилик назоратини амалга ошириш учун шароитлар яратади;
– шаҳарсозлик ҳужжатлари лойиҳалари қонунда белгиланган тартибда жамоатчилик муҳокамасидан ўтказилади (49-модда).
Ушбу янгилик аҳоли пунктларида белгиланган меъёр ва қоидаларга риоя қилмасдан объектлар қурилишининг олдини олиш учун ишончли кафолатлар яратади
ва шаҳарларнинг (туманларнинг) меъморий қиёфасини яратиш жараёнида фуқароларнинг иштирокини таъминлайди. Бундай шароитда фуқароларнинг шаҳарсозлик фаолияти натижасида табиат ифлосланишининг олдини олиш орқали уларнинг экологик ҳуқуқлари таъминланишини назорат қилиш ҳуқуқи ҳам мустаҳкамланмоқда.
V. Конституцияга узгартишлар бутун давлат ҳокимияти тизимини демократлаштириш учун асоси ҳисобланган ҳокимият бўлиниши тамойилини изчил амалга оширишнинг муҳим омилига айланмоқда.
ҲОКИМИЯТНИНГ ВАКИЛЛИК ОРГАНЛАРИ.
5.1. Парламент юқори палатасини самарали шакллантириш, унинг асосий мақсади ҳудудий вакиллик эканлигидан келиб чиқиб, юқори палата фаолиятини оптималлаштириш, халқ депутатлари Кенгашларининг ўзаро ҳамкорлиги
ва фаолиятини мувофиқлаштиришнинг ноёб платформаси ва самарали майдончасини сақлаб қолиш, Олий Мажлис палаталари фаолиятида параллелизмни истисно қилиш, Янги Ўзбекистонда олиб борилаётган маъмурий ислоҳотларнинг мақсади ва вазифаларидан келиб чиқиб, парламентнинг юқори палатаси – Сенат модернизация қилинмоқда, шунингдек парламентнинг қуйи палатаси – Қонунчилик палатасининг ваколатлари кучайтирилмоқда.
Амалдаги Конституцияда Қонунчилик палатасининг мутлақ ваколатларига 5 та ваколат киритилган бўлса, лойиҳадаги тузатишларга кўра уларнинг сони 12 тага етмоқда. Сенатнинг мутлақ ваколатлари амалдаги 14 тадан 18 тага кўпаймоқда.

•