Arxitekturaviy dasturiy loyihalash

Uchastkaning bosh rejasi
Maktabgacha ta’lim - tarbiya mikrorayon bo’yicha bir tekis, iloji bo’lsa, har bir mahallada joylashtirish lozim, ya’ni mahalla markazida guzar yonida, ko’kalamzorlar massivi yaqinida joylashtirish va magistral ko’chalar bilan chegaralangan, faqat shu mahalla aholisiga xizmat ko’rsatishi kerak. Xizmat ko’rsatishning normadagi radiusi 300-400 m. Har bir bolalar muassasasi mustaqil (alohida) yer maydoniga ega bo’lishi kerak bo’lib, u uning ajralmas qismi hisoblanadi va bolalar bilan tarbiyaviy va o’quv ishlarida juda katta o’rinni egallaydi. Yer uchastkalarining o’lchami bolalar muassasasining hajmiga bog’lik va har bolaga 30 m.kv. hisobida qabul qilinadi. Uchastka turli xil vazifani bajaruvchi bolalar maydonchalaridan, ko’kalamzorlashtirilgan hudud va xo’jalik vazifasini bajaruvchi hududdan iborat. Har bir bolalar guruhi uchun uchastkada alohida maydoncha ajratiladi. (yasli guruhlarida 7,5m.kv., maktabgacha tarbiya guruhlarida 7,2 m.kv.dan hisoblaganda). Bu maydonchalar hamma o’tib yuradigan joyda bo’lmasligi kerak,ularni bolalar guruhlarining xonalaridan chiqadigan joyga yaqin qilib joylashtirish kerak. Har bir maydoncha butalar bilan ajratilib, soyabonlar bilan jihozlanishi kerak. (yuzi 40 m.kv.) Ko’kalamzorlashtirilgan maydon uchastkaning 40-50%ni tashkil etishi kerak. Sport hududi yengil atletika maydonchasidan, yozgi basseyndan, futbol va valeybol o’yinlari uchun maydonchalardan tashkil topishi kerak.

Xo’jalik hovlisi (100-240m.kv.) ko’cha bilan qulay aloqaga ega bo’lishi kerak. Bolalar, ota - ona, xodimlar foydalanadigan maydonchalardan ajratilgan bo’lgani ma’qul.