Andijon davlat tibbiyot instituti

Suspenziyalar - Suspensiones
(Suspenziya - bosh kelishik birlikda Suspensio, qaratqich kelishik birlikda Suspensionis, qisqartmasi Susp.)
Suspenziyalar suvda erimaydigan qattiq dorining o‘ta mayda zarrachalarini biror suyuqlik (suv, o‘simlik yog‘lari, glitserin)da muallaq holda bo‘lgan sutsimon suyuq dori shaklidir. Kolloid eritmalarga nisbatan suspenziyaning muallaq zarrachalari yiriqroq bo‘ladi (0,1 mkm dan katta). Zarrachalari 0,1-1 mkm bo‘lsa mayin, 1 mkm dan katta bo‘lsa qo‘pol suspenziya hisoblanadi.
Suspenziyalarda qattiq dorining maydalik darajasi kukunga nisbatan yuqori bo‘lganligi uchun organizmga dori tez ta’sir ko‘rsatadi. Suspenziyalar ishlatishdan oldin chayqatilib, ichishga, sirtga ishlatish uchun va parenteral (m/i, bo‘shliqlarga) yuborish mumkin. Suspenziyalarga retsept qisqartirilgan va kengaytirilgan ko‘rinishda yoziladi.
Suvda tayyorlangan va ofitsinal suspenziyalar qisqartirilgan ko‘rinishda, o‘simlik yog‘larida, glitserin, vazelin moyida tayyorlanadigan suspenziyalar kengaytirilgan ko‘rinishda yoziladi.
Misollar: 100 ml grizeofulvin (Griseofulvinum, Griseofulvin) ofitsinal suspenziyasini 1 desert qoshiqdan kuniga 3 mahal ichishga buyurilsin. Ichishdan oldin chayqatilsin.

Rp.: Susp. Griseofulvini 100 ml

(Griseofulvin)
D.S. 1 desert qoshiqdan kuniga 3 mahal ichish uchun
(ichishdan oldin chayqatilsin).
10 ml 0,5% gidrokortizon atsetati (Hydrocortisoni acetas, Hydrocortisone) saqlovchi suvli suspenziyani ko‘z tomchisi sifatida ishlatishdan oldin chayqatib, 2 tomchidan kuniga 4 mahal ko‘zga tomizish uchun buyurilsin.

Rp.: Susp. Hydrocortisoni acetatis 0,5%-10 ml

(Hydrocortisone)
D.S. Ko‘z tomchisi. Chayqatib 2 tomchidan kuniga
4 mahal ko‘zga tomizish uchun.
50 ml steril 0,5% li trixomonatsid (Trichomonacidum, Trichomonacidum)ning vazelin moyi (Oleum Vaseline, Liquid parafin)dagi suspenziyasini siydik pufagiga 10 mldan yuborish uchun buyurilsin.
Rp.: Trichomonacidi 0,25
(Trichomonacidum)
Olei Vaselini ad 50 ml
(Liquid parafin)
M.f . suspensio
Sterilis!
D.S. Ishlatishdan oldin chayqatib 10 mldan
siydik pufagiga yuborish uchun.