Alijonova durdona farhodjon qizi

1.4-rasm. Marketing bilan yondosh sohalar
Yondosh soha terminlari bilan bog‘liqligi – bu marketing termini ham bir tizim doirasida qo‘llanib, ayni shu soha uchun xizmat qiladi. Shuningdek, maxsus leksika tarkibida o‘rganiladi. Mushtarak jihatlari deganda, birinchidan, o‘zlashma terminlarning miqdoran ko‘pligi, terminni o‘zbekchalashtirishda kalkalash, natijada, termin strukturasining o‘zgarishi: o‘rmalovchi inflyatsiya, bozor muvozanati, iqtisodiy inqiroz kabi. Shuningdek, yondosh soha terminlarida kalkalash tufayli birikma terminlarning hosil bo‘lganligi. Bularning barchasi mushtarak jihatlarni mujassam etadi. Marketing terminlarining yondosh soha terminlaridan farqi:

1) sohada transterminlarning miqdoran ko‘pligi, ya’ni lug‘atlarda aynan sohaning o‘ziniki bo‘lgan terminlar mavjud emasligi, buning sababi esa yaqin vaqtlargacha marketing terminlari iqtisodiyot terminlari tarkibida ekanligi;

2) o‘z qatlamga oid terminlarning ayrimlari iste’moldan chiqqanligi va ularning o‘rni o‘zlashma terminlar bilan to‘ldirib tashlangani;

3) ushbu sohaga oid konkret ishlangan lug‘atlarning kamligi, ishlanmaganligi;

4) zamonga hamnafas bo‘lgan, qamrovi keng soha ekanligi;

5) kalkalash natijasida tarkibli terminlarning miqdoran ko‘pligi;

6) umumiste’moldagi so‘zlarning terminga ko‘chish jarayoni soha terminologiyasida salmoqli o‘rin egallaganligi;

7) sohaga oid terminlar hali umumleksik qatlamdan joy olmaganligi hokazo.

Integral xususiyatlar orqali soha terminlari yondosh sohalar bilan birlikda o‘rganilsa, differensial tomonlari bilan sohaning o‘zigagina xos xususiyatlar ochiladi. Marketing terminologiyasini yondosh soha terminlogik tizimlari bilan taqqosladik, natijada mavzumiz yangidan yangi ma’lumotlar va misollar bilan boyidi.