Ахмедов Фурқат Қўлдошевич Абдулахатов Акрамжон Рўзмаматович Хайитов Олимжон Тошевич

Миллий қадриятлар 
Қадриятлар тизимида миллат, унга хос белгилар, жиҳатлар, хусусиятлар, 
уларнинг вужудга келиш жараёнларига муайян даражада таъсир кўрсатган 
ҳудуд ва у билан боғлиқ туйғулар, миллатнинг ўтмиши, тарихи, маданияти, у 
яратган маданий бойликлар ва маънавий мерос билан боғлиқ қадриятлар ҳам 
муҳим ўринни эгаллайди. Бу қадриятлар бирор миллат кишилари учун 
умумий бўлиб ҳисобланади. Улар алоҳида шахс қадриятларини умуминсоний 
қадриятлар билан боғловчи халқлардан биридир. Муайян киши ёки шахс 
умуминсоний қадриятларни англашда, ўз фаолиятини ушбу қадриятлар 
мезонига мослаштиришда миллий қадриятларни ҳисобга олади, улар билан 
боғлиқ жиҳатларни ҳам назарда тутади. 
Дунёдаги халқлар орасида айнан шу миллатнинг борлиги, мавжудлиги, 
бетакрорлиги, «Кўҳна тарих шодасида битта маржон» (Э.Воҳидов) сифатида 
зоҳирлиги ҳар қандай киши учун аҳамиятга эга бўлиши табиий. Миллат – ҳар 
қандай миллий қадриятнинг объекти, миллий қадриятлар тизими таянадиган 
ижтимоий асосдир. «Миллат» атамаси қадрият объекти сифатида 
тушунилганида, бир-бири билан қон-қариндош халқларга нисбатан 
ишлатиладиган «туркий халқлар», «славянлар», «роман халқлари» кабиларга 
умуммиллийлик даражаси мос келади. 
Миллат бир томондан, ўзининг қадриятларини мутаасил вужудга 
келтириб туради, ўтмишдан келажакка ривожланиш жараёнида уларни 
доимий такомилаштириб, янги-янги кирраларини шакллантириб туради, 
иккинчи томондан эса, унинг ўзи ҳам мавжуд қадриятлар тизими таъсири 
остида ўзгариб ва ривожланиб боради. Миллат - узининг қадриятларини 
вужудга келтириб, уларнинг янги-янги қирраларини ва жиҳатларини 
сайқаллаштириб, тараққиёт жараёнида такомиллаштириб туриши маъносида 
ўз қадриятларининг ҳақиқий эгаси, макон ва замондаги илгариланма 
ҳаракатдан иборат ўзгаришлар жараёнида уларни утмишдан келажакка томон 
етказиб берадиган энг асосий объектдир.