Agza aňkarmak — Kişi maslahatyna gulak gabartmak; biriniň pikirine eýermek.— Garrylaryň agzyna aňkarylmazlar-da, öz etjegiňi edibirler (A. Gowşudow). Öz ýanyndan ol adam hem Hoşgeldini “sary agyz”, göreniň agzyna aňkaryp ýören hasaplady

Kibtiňi gysmak — 1. Yşarat bilen zatdan bihabardygyňy ýa-da geňirgenýändigiňi bildirmek. Dogrudan hem düşemok—diýip, Nazarow başyny ýaýkady-da, ellerini serip, kibtini gysdy («Sowet edebiýaty»). 2. Utançly, gorkuly, ätiýaçly, ünjüli ýagdaýda müzzerilmek, mysapyrsyramak, ejizlik etmek, Dogrusyndan gelinse, ýaňy-ýakynda hem mysapyrsyrap, kibtini gysar ýörerdi (H. Ysmaýylow).

Köýnegine (donuna) sygmazlyk — 1. Gaty begenmeklik, şatlanmaklyk. Ýetilende ussahanaň ýanyna, Gelin sygman köýneginedonuna (T. Esenowa). 2. Gaty semremek.

Kül bolmak — 1. Çym-pytrak, kül-owram bolup döwülmek. Aýnanyň elindäki çüýşesi ýere gaçyp, kül boldy. 2. Bir zadyň ugrunda ýanyp bişmek, heläk bolmak, örtenmek. Ýar-ýar!... diýip kül boldum, Kime galar webalym?! (H. Derýaýew). Italmazyň işinden Sona ýanyp kül bolýar (A. Alamyşow). Neşe üçin hallaslap, Gözel ömrüň kül boldy (B. Japarow).

Külüni çykarmak—1. Derbi-dagyn etmek, ýok etmek, çym-pytrak etmek, bütinleý zaýalamak. Maşyny agaja urduryp külüni çykarypdyr. 2. Hötdesinden gelmek, üstünlikli amala aşyrmagy başarmak. Men ol işiň külüni çykararyn.

Kül etmek—1. Urup owratmak, döwmek, maýda-maýda etmek, urmak. Mergen ata, göýber meni, men ol mollajygyň agzyny kül edeýin (A. Gowşudow). 2. Zarba urup ýok etmek, derbi-dagyn etmek, üstün çykmak. Çekirtge dek çozup gelen keseki, Güm edildi, kül edildi, kowuldy (A. Haýydow). Duşmanlary, kül eder. Oň edermen gaýraty («Çemen»). 3. ser. K ü l ü n i ç y k a r m a k. Men başarman näme, kül ederin.

L

Lenç etmek — 1. Şol bir zady gaýtalamak, ýagyr etmek. Ol lenç edilen standart jümlelerden peýdalanamok («Sowet Türkmenistany»). 2. Torç etmek, basgylamak, depelemek. Hüjum edip çar tarapdan kän ýagy, Lenç edildi depeleriň topragy (A. Kekilow).

Maňlaýa urmak — 1. Ýüzüne aýtmak, göni aýtmak; gyjyt bermek. — Bir aýybyňy tapsa, mydama maňlaýyňa urup ýör (B. Öwezow). Genjim agam şunuň ýaly gyjytly sözleri maňlaýyma urdy (Görogly). 2. Puşman etmek, ahmyr çekmek, öz-özüňe käýinmek. Öz-özüňe käýinip, gaýta-gaýta maňlaýyna urupdyr. (A. Soltanmyradow).