Adabiyot Abituriyentlar uchun 3-qism mustaqillik davri o‘zbek adabiyoti

Yetmish besh yil Yashadi.
Ammo O‘ttiz ikki yoshda
Bu dunyoni Tashladi.
Shoir umri Qoldi she’rda,
Qoldi Yoniq dostonda.
Bitganlari uning – yerda,
Ruhi esa – osmonda.

* * *

Ko‘tarolmay Dardlar yukin,
Zamin qalqib turibdi.
Nazrul Islom Ruhi bukun
Olam kezib yuribdi.
Ilhom chog‘i Dil zamindan
Ko‘k toqiga o‘rlaydi.
Nazrul Islom Ruhi mendan
Shunda hisob so‘raydi.
Shoir bo‘lib Elga bukun
Darkormisan, der menga.
Fidolikka xalqing uchun
Tayyormisan, der menga.
Der: «Shoirlik – yurakda qon –
Silqib turgan jarohat.
Tilamasman senga, o‘g‘lon.
Osuda baxt, Farog‘at.
Tilamasman bir zum orom,
To tiriksan, Bedor bo‘l.
Azob bersin senga ilhom,
She’r dardida bemor bo‘l.
Taqdiringdan senga dunyo
Rohatlarin so‘rmasman.
O‘z qismatim senga ammo
Sira ravo ko‘rmasman.
«Saqla, – deydi, – yurak qo‘ring.
Dil otashing so‘nmasin.
Umring ado bo‘lmay turib
Cho‘g‘ing ado bo‘lmasin».

1978–1979


«RUHLAR ISYONI» DOSTONI HAQIDA
«Ruhlar isyoni» dostoni Erkin Vohidov ijodida muhim o‘rin tutadi. Doston o‘tgan asrning birinchi yarmida yashab ijod etgan otashin bengal shoiri Nazrul Islomning qahramonona va fojiali taqdiriga bag‘ishlanadi.
Dostonda Vatanining ingliz mustamlakachilaridan ozod bo‘lishini orzu qilgan va mana shu yo‘lda o‘z umri hamda erkini baxshida etgan vatanparvar Nazrul Islomning tutqunlikdagi hayoti, his-tuyg‘ulari badiiy tasvirlanadi.
Dostondagi «Isyon qo‘shig‘i»da Nazrul Islom hind xalqini asriy qullikka qarshi kurashga, o‘z ozod ligi uchun bosh ko‘tarishga da’vat etadi:
So‘yla, inson, So‘yla, qadding ko‘tarib baland.
Yuksaklikda sening qadring Himolay monand...
Dostondagi qator mavzularni yoritishda shoir turli xil afsona hamda rivoyatlardan foydalanadi. Dostonning 3-faslidagi «Tutqunlik» mavzusida Nazrul Islomning zindondagi o‘y-xayollari, insoniy his-tuyg‘ulari mohirona va ishonarli tarzda bayon etiladi.