Abbatisa – ayollar katolik monastirlarining boshqaruvchilari. Abbatlik

Ilohiy sud – ilk oʻrta asrlar davrida shakllangan qarashlar boʻlib, olov, qizdirilgan temir va suv (sovuq va qaynagan suv bilan) yordamida amalga oshirilgan. Munozara qilayotgan tomonlar oʻzaro jang qilishlari talab qilinib, ularning gʻolib chiqqani haq deb topilgan. Bunda asosan, yolgʻonchilar va jinoyatchilarga nisbatan qoʻllanilgan. Agarda aybdor ayol kishi boʻlsa, oʻz oʻrniga birorta ritsarni qoʻyishi mumkin boʻlgan. I.S.lar XII asrda Angliya va XIII asrda Fransiya davlatlarida boshqa sudlar bilan almashtirildi.
Ilohiy tinchlik – harbiy harakatlar paytidagi ma’lum bir sharoitlarda belgilangan shaxslarni oʻldirishni va ularga moddiy zarar yetkazishni taqiqlash. I.T. harakati X asrda Fransiyada (989-yil Sharu soborida qaror qilingan) vujudga kelgan. 1095-yil Klermon–Ferran sabori qarorlariga koʻra rohiblar, ruhoniylar va ayollar oʻrtasidagi qonli toʻqnashuvlarni tugatishga qaror qilindi. 1149-yildagi Reyms soborida urushlar paytida ruhoniylar, dindorlar, sayyohlar va dehqonlarning daxlsizligi toʻgʻrisida qaror qabul qiladi. I.T.ni buzganlar cherkov tomonidan jazoga tortilgan. I.T. gʻoyasi orqali papa va katolik cherkovi oʻzining Yevropadagi ta’sirini yanada oshi-rishni rejalashtirgan. Garchi oddiy xalqning kuchli qoʻllab–quvvatlashiga erishgan boʻlsada, ammo I.T. oʻzaro feodal urushlar sabab samarali boʻlmagan. XII asrdan boshlab ilohiy tinchlik gʻoyasi qirol hokimiyatini kuchaytirish uchun xizmat qila boshladi. Fransiya qirollari Lyudovik VI va Lyudovik VII lar I.T. gʻoyalarini qaytadan ilgari surishgan.
Immunitet (lot.immunitas – daxlsiz, nimadandir xolos qilingan) – feodalning oʻz mulkida ayrim markaziy hokimiyatga tegishli boʻlgan vakolatlarni (sud, soliq yigʻish, safarbarlikka chaqirish va h.k.) amalga oshirish huquqi. Franklar davlatida VII asrdan boshlab tarqalgan. Qirol I.i yorliq bilan berilgan boʻlib, unga koʻra qirol amaldorlari I. olgan feodalning mulklariga kelishlari taqiqlangan (shuning uchun ham daxlsiz) va oʻz mulkidagi dehqonlar ustidan toʻliq hokimiyat oʻrnatgan. Odatda yirik senorlar va oliy ruhoniylar qatlami ushbu huquqni olganlar. I. yorliqlari qoʻllaniluvchi hududlar I. okruglar deb atalgan va ular feodal tarqoqlikka olib kelgan sabablardan biri boʻldi.