Abbatisa – ayollar katolik monastirlarining boshqaruvchilari. Abbatlik

Nikteparx – Vizantiyada eparx yordamchilari. Kichik eparx.
Nikeya imperiyasi – Vizantiya hududida qaror topgan eng ta’sirli va iqtisodiy barqaror yunon davlatlaridan biri (1204-1261). Uning tarkibiga Nikeya, Nimfey, Smirna, Filadelfiya kabi boy hududlar kirgan. Davlatning asoschisi gʻayratli va aqlli hukmdor Feodor I Laskaris (1206-1222, 1204-1206-yillarda Nikey despoti) boʻlgan. U qisqa vaqt ichida yerlarning katta qismini oʻz ixtiyoriga oʻtkazishga erishdi, bu uning qudratli hukmdorga aylanishiga zamin yaratib berdi. Olingan yerlarni imperatorga harbiy xizmat oʻtash sharti bilan proniya tarzida oʻz tarafdorlariga tarqatdi. Proniyalar ustidan oliy egalik huquqini saqlab qoldi, bu esa feodallarning taxt atrofida uyushishiga va imperiyaning harbiy qudrati mustahkamlanishiga olib keldi. Ioann III Duka Vatas (1222-1254) Feodor I ning vorisi va kiyovi boʻlib, u taniqli boshqaruvchi hamda qoʻmondon boʻlgan. Uning boshqaruvi davrida imperiya hududi sezilarli ravishda kengayib, hunarmandchilik ishlab chiqarishi rivojlandi, qoʻshnilar bilan savdo-sotiqni rivojlantirdi. Qoʻli ochiq hukmdor sifatida san’at va fanga homiylik qildi. Ioann III ning vorisi boʻlgan oʻgʻli Feodor II Laskaris (1254-1258) mashhur faylasuf sifatida imperiyani madaniyat markazlaridan biriga aylantirdi. 1261-yilda Nikeya imperatori boʻlgan Mixail VIII Konstantinopolga muvaffaqqiyatli yurishni amalga oshirib, Vizantiya imperiyasini qayta tikladi.
Nikopol salib yurishi – 1396-yilda Yevropaning besh davlati – Vengriya, Germaniya, Chexiya, Fransiya va Polshaning vengr qiroli Sigizmund I tashabbusi bilan usmoniy turklarga qarshi amalga oshirgan yurishi. Yurishdan koʻzlangan asosiy maqsad XVI asr 60-yillaridan boshlangan usmoniy turklarning Yevropa yurishlarini toʻxtatish edi. 25-oktabrda Nikopol yaqinida boʻlib oʻtgan jangda Yildirim Boyazid yevropalik ritsar-salibchilarni magʻlubiyatga uchratdi va 10 ming nafar ritsarlarni asirlarga olgan (ulardan 300 nafar taniqli asirlarning joni saqlab qolinib, katta toʻlov evaziga qoʻyib yuborilgan). Ushbu jangdan keyin usmoniy turklar Bolqon yarim orolida toʻla mustahkamlanib oldi va Gʻarbiy Yevropaga doimiy tahdid solib turishdi.