Abbatisa – ayollar katolik monastirlarining boshqaruvchilari. Abbatlik

Parlament (frans. gapirmoq, kengash qilmoq) – 1) Toifaviy-vakillik muassasasi. Angliyada 1265-yilda Simon de Monfor tomonidan birinchi marta chaqirilgan, unda yirik baronlar va ruhoniylardan tashqari har bir graflikdan ikkitadan ritsar va nisbatan ta’sirli shaharlardan ikkitadan vakil chaqirilgan. Eduard I davrida toʻliq shakllangan. Shundan boshlab Angliyada toifaviy monarxiya paydo boʻlgan. XIV asr 1-yarmida ikki palataga ajratildi. Yuqori palata hisoblangan lordlar palatasiga yirik diniy va dunyoviy feodallar shaxsan qirol maktubi bilan chaqirilgan boʻlsa, quyi palata – jamoa palatada ritsarlar (grafliklardagi yigʻilishlarda har bir graflikdan ochiq ovoz bilan ikkitadan ritsar saylab olingan. Jami ushbu palataga 74 nafar ritsarlar yuborilgan) va shaharliklar vakillari (Eduard I davrida 165 ta shahardan (ularning koʻpchiligi kichik shaharlar edi) ikkitadan vakil chaqirilgan, bu shaharlarning juda koʻpchiligi mayda shaharlar boʻlgan) majlis qilishgan. Ular birgalashib son jihatidan baronlardan koʻpchilikni tashkil qilgan va shu boisdan palata “jamoa” atamasi bilan atalgan. P.ning asosiy vazifasi soliqlarni tasdiqlash va taxt uchun subsidiyalarni ajratishdan iborat boʻlgan. XIV asrda qonunlar (statut, bill) qabul qilish huquqini qoʻlga kiritgan. Lordlar palatasi siyosiy ishlar boʻyicha oliy sud organi vazifasini bajargan. Shaharning quyi qatlam va dehqonlarning vakillari P.da boʻlmagan; 2) Fransiyada Lyudovik IX davrida qirollik kengashidan ajralib chiqqan oliy ma’muriy-sud mahkamasi. XIII-XIV asrlarda bir necha palatalardan iborat boʻlgan. XV asrning oʻrtalarida jinoyat palatasi shakllandi. Har bir palataning boshida prezident turgan, barcha palatalarning tepasida boʻlsa birinchi prezident turgan. Parij P.i qirol farmonlarini qayd etib borgan, remonstartsiya huquqiga ega boʻlgan, ya’ni oliy appellyatsiya instansiyasi vazifasini bajargan. Parij P.ida asosiy rolni legistlar oʻynagan. Provinsiyalarda ham oliy sud vazifasini bajaruvchi provinsial P.lar tuzilgan boʻlib, ularning soni jami 13 tani tashkil qilgan.