Abbatisa – ayollar katolik monastirlarining boshqaruvchilari. Abbatlik

Oldormen (ingl.) – 1) sex (gildiya) oqsoqoli; 2) shahar magistratligi yoki graflik kengashi a’zosi boʻlib, u tartib va qonunlarga rioya qilinishini nazorat qilgan; merdan keyingi ikkinchi shaxs boʻlgan.
Olovli palata – Fransiyada Genrix II (1547-1559) davrida tuzilgan protestantizmga qarshi kurashuvchi palata.
Oltin bulla – 1) Imperator Karl IV Lyuksemburg tomonidan 1356-yilda “Muqaddas Rim imperiyasi”ning asosiy konstitutsiyaviy qonuni sifatida qabul qilingan qonunchilik hujjati. O.B. kurfyuristlarning toʻliq siyosiy mustaqilligini tan oldi. Germaniyada mavjud knyazliklarning koʻphokimiyatliligini e’tirof etdi. Eng asosiysi imperatorni 7 knyaz-kurfyuristlar (3 ta cherkov vakillari – Mayns, Kyol, Trir arxiyepiskoplari va 4 nafar dunyoviy knyazlar – Chexiya qiroli, Reyn pfalsgrafi, Saksoniya gersogi, Brandenburg markgrafi) kollegiyasi saylashligi tartibi oʻrnatildi. Frankfurt va Maynda boʻlib oʻtadigan ushbu kollegiyaning yigʻilishida koʻpchilik ovoz bilan imperator saylangan. Saylov Mayns arxiyepiskopi tashabbusi bilan oʻtkazilishi lozim edi. O.B.da shuningdek, kurfyuristlarning majburiyatlari va knyazlarning eski imtiyozlari bilan birga yangi imtiyozlarini e’tirof etdi. Unga koʻra knyazlarga togʻ foydali qazilmalarini qayta ishlash, tangalar zarb qilish, bojxona soliqlarini olish, oliy sud vakolati va yahudiy aholisi ustidan sud qilish huquqlari berildi. Shu bilan birga oʻzaro urushlarni qonuniylashtirib berdi (faqatgina vassallarning oʻz senoriga qarshi urush olib borishi taqiqlandi, qolgan barcha holatlardagi urushlarga ruxsat berildi) va shaharlar oʻrtasida ittifoqlarni taqiqladi. O.B. Germaniyada siyosiy tarqoqlikning yanada kuchayishiga xizmat qildi. 1806-yilgacha amalda boʻldi; 2) Vengriyada qirol Andrey II tomonidan feodal-magnatlar qoʻzgʻalonidan hayiqib, ularning huquqlarini kafoloti sifatida 1222-yilda chiqarilgan farmon ham shu nom bilan atalgan.
“Oltin kitob” – Venetsiyada mashhur xonadonlarning (familiyalarning) roʻyxati. 1297-yilda Katta kengashdagi islohotdan soʻng tuzilgan. Belgilangan tartibga koʻra, Katta kengashga va respublikadagi barcha muhim davlat lavozimlarini egallash “O.K.”ga kirgan xonadon vakillarigina ruxsat berilgan. 1506-yilda “O.K.” nomini oldi.