6-боб липидлaр aлмaшинуви

Одам тўқимаси асосий липидларининг тузилиши ва таснифи
Одам организмида ёғ кислоталари жуфт углерод атомига эга, бу уларнинг биосинтезига боғлиқ бўлиб, бунда ёғ кислота углеводород радикалига кетма-кет икки углеродли фрагментлар қўшилади.
Ёғ кислоталари — турли липидларнинг структур компонен­тларидир. Учацилглицероллар таркибида ёғ кислоталари энергия депоси вазифасини бажарадилар, чунки уларнинг радикаллари энергияга бой СН₂-гуруҳни сақлайди. СН-боғларнинг оксидланишида углеводлар оксидланишига нисбатан кўпроқ энергия ажралади, чунки углеводларда углерод атоми қисман оксидланган (-НСОН-). Фосфолипид ва сфинголипидлар таркибида ёғ кислоталар мембраналарнинг ички гидрофоб қаватини ҳосил қилиб, унинг хусусиятларини белгилаб беради. Организмдаги ёғлар ва фосфолипидлар тананинг меъёрий ҳароратида суюқ консистенцияга эга, чунки тўйинган ёғ кислоталарига нисбатан тўйинмаганларнинг миқдори кўп. Мембрана фосфолипидларида тўйинмаган ёғ кислоталари 80 – 85 %, тери ости ёғ қавати таркибида эса — 60 %гача бўлиши мумкин.
Эркин, этерифицирланмаган ҳолатда организмда ёғ кислоталари кам миқдорда бўлиб, масалан қонда улар альбумин оқсили билан биргаликда ташилади.
Инсонлар липидидаги ёғ кислоталар тармоқланмаган углеводород занжир бўлиб, унинг бир учида карбоксил гуруҳи, бошқасида эса метил гуруҳи жойлашган. Организмдаги кўпчилик ёғ кислоталари жуфт сонли углерод атомига эга — 16 дан 20 гача (1-жадвал). Қўш боғлар сақламайдиган ёғ кислоталари тўйинган деб аталади. Инсон липидларидаги асосий тўйинган ёғ кислота – пальмитин кислотаси ҳисобланади (30 – 35 %гача). Қўш боғ сақлайдиган ёғ кислоталари – тўйинмаган деб аталади. Тўйинмаган ёғ кислоталари моноен (битта қўш боғли) ва полиен (икки ва кўп сонли қўш боғ) бўлади. Агар ёғ кислота таркибида икки ва ундан ортиқ қўш боғ сақланса, улар СН₂-гуруҳдан кейин жойлашади. Ёғ кислоталари структурасини кўрсатишнинг бир неча усуллари мавжуд. Ёғ кислотани сонли символлар билан белгилаганда (қаранг 1-жадвал) углерод атомларининг умумий сони икки нуқтагача кўрсатилади, икки нуқтадан сўнг қўш боғлар сони келтирилади. Қўш боғ жойлашган жой ∆ белгиси билан кўрсатилади, ундан сўнг карбоксил гуруҳига яқин қўш боғ жойлашган углерод атомининг номери кўрсатилади. Масалан, С18:1∆9 ёғ кислотаси 18 углерод атоми ва карбоксил гуруҳдан бошлаб саналганда 9-углерод атомида битта қўш боғ сақлашини кўрсатади. Қўш боғнинг жойлашиши бошқа усул – биринчи қўш боғнинг жойлашиши билан ҳам кўрсатилиши мумкин. Масалан, линол кислота С18:2∆9,12 ёки С18:2ω-6 қилиб белгиланиши мумкин. Биринчи қўш боғнинг метил углероддан жойлашишига кўра кўп тўйинмаган ёғ кислоталари ω-3 и ω-6 оилачаларига бўлинади.