5-мавзу. Корхонанинг инновацион стратегияси ва инновацион салоҳияти. Режа

Инновацион ривожланиш.
Корхонанинг инновацион стратегик ривожланиши – барқарор ўсишнинг рақобатбардош стратегияси бўлиб, инновацион жараёнлар ва технологияларни тўла ҳисобга олишга асосланган бўлади. Корхона менежменти тизимида барқарор ўсишнинг рақобатбардош инновацион стратегияси қуйидагилар туфайли амалга оширилади:

• 
  корпоратив мақсадни амалга оширишга мўлжалланган фаолиятнинг аниқ турини ривожлантириш стратегик дастури;
  
• 
  корхонанинг стратегик мақсадга эришиш босқичлари изчиллигининг устувор йўналишини, мақсад ва вазифаларини, ресурсларни аниқлаб берувчи бош режаси;
  
• 
  халқаро, корпоратив, тармоқ, тармоқлараро йўналишда технологик омилларни максимал даражада ҳисобга олиш асосида корхонанинг мақсадга эришиш восита ва усуллари мажмуи.
  

У ёки бу инновацион стратегия, корхона фаолиятининг инновацион жараёнида янги маҳсулотларни, технология ва хизматни яратишда, янги усуллар ва воситалардан фойдаланишда илмий тадқиқот ва тажриба конструкторлик ишларида, ишлаб чиқаришда, маркетингда ва бошқаришда ҳамда янги ташкилий тузилмани яратишда анъанавий бўлмаган ресурслар турини ўзлаштиришда қўлланилади. Корхонани ривожлантиришнинг инновацион стратегияси бир томондан узоқ муддатга мўлжалланган мақсад ва вазифаларни (ишлаб чиқариш, иқтисодий, тижорат, илмий-техник, ташкилий, ижтимоий ва бошқалар) илмий асослаш стратегияси сифатида намоён бўлади. Иккинчидан корхона мақсади ва вазифаларига эришиш жараёнида унинг фаолиятини тартибга солиш омили бўлиб хизмат қилади. Шу билан бирга бир вақтнинг ўзида корхонани ташқи технологик ва бозор муҳити билан боғлайди. Ушбу ҳолат корхона фаолиятининг ажралмас элементи ҳисобланади:

• 
  корхонани стратегик ривожлантириш концепциясини технологик омилни ҳисобга олган ҳолда ишлаб чиқиш;
  
• 
  корхонанинг инновацияга асосланган рақобатбардош стратегиясини ҳаётга жорий этиш, лойиҳа ва стратегик дастурни ишлаб чиқиш;
  
• 
  корхонанинг ривожланиши ва фаолиятини назорат қилиш;
  
• 
  инновацион дастур ва лойиҳаларни молиявий, моддий ресурслар билан таъминлаш стратегиясини ишлаб чиқиш;
  
• 
  инновацион фаолиятни малакали мутахассислар билан таъминлаш стратегиясини ишлаб чиқиш.
  

Инновацион стратегия – инновацион тамойиллар асосида шаклланадиган стратегиянинг фундаментал базаси, корхоналарда маркетинг, молиявий ва бошқа стратегияларни ишлаб чиқишнинг асоси ҳисобланади. Стратегик менежмент доирасида инновацион стратегия корхонанинг барча бошқа функционал стратегияси билан алоқадорлигини таъминлашнинг асосий элементи ҳисобланади.
Инновацион фаолият корхонага жорий этиладиган ҳар бир инновацион жараён билан боғлиқ бошқарув функциясини ҳаётга жорий этишга хизмат қилади. Ресурсларни ўзлаштириш шароитининг ўзгаришига корхонанинг мослашуви, ривожланишнинг ички омиллари, ишлаб чиқариш, тижорат, ташкилий бошқарув, илмий-техник фаолиятни интеграция-лашувини ҳамда инновацион салоҳиятдан тўла фойдаланишни таъминлайди.
Инновацион стратегия корхонани бошқаришнинг барча даражаларида корхона стратегиясини ишлаб чиқишнинг калити ҳисобланади. Инновацион стратегия компонентлари алоқасини 5.3-расмда келтирилган шаклда ифода-лаш мумкин.