Hududiy qurilish nazorat inspeksiyasining huquq va majburiyatlari Hududiy qurilish nazorat inspeksiyasi o’ziga yuklangan asosiy vazifalar va funksiyalarni bajarish uchun quyidagi huquqlarga ega:
davlat va xo’jalik boshqaruvining hududiy bo’linmalaridan, davlat hokimiyati organlaridan o’z vakolatiga doirasiga kiruvchi masalalarni hal qilish uchun zarur bo’lgan ma’lumotlarni belgilangan tartibda so’rash va olish;
davlat va xo’jalik boshqaruvining hududiy bo’linmalariga, mahalliy davlat hokimiyati organlariga Hududiy qurilish nazorat inspeksiyasi vakolatiga kiruvchi masalalar yuzasidan takliflar kiritish;
moliyalashtirish manbalaridan qat’i nazar qurilish obyektlariga, subyektning moliyaviy-xo’jalik faoliyatiga aralashmagan holda, hyech qanday to’siqsiz kirish hamda ruxsat hujjatlari mavjudligi va shaharsozlik me’yorlari hamda qoidalariga rioya qilinishi yuzasidan qisqa muddatli tekshirish;
tekshirish jarayonida aniqlangan huquqbuzarliklarni bartaraf etish bo’yicha yuridik va jismoniy shaxslarga bajarilishi majburiy bo’lgan yozma ko’rsatmalar berish;
Hududiy qurilish nazorat inspeksiyasida belgilangan tartibda ro’yxatdan o’tkazilgan obyektlarni hyech qanday to’siqsiz borib ko’rish va nazorat funksiyalarini amalga oshirish;
foydalanilayotgan qurilish materiallari, buyumlari, konstruksiyalari va bajarilayotgan qurilish-montaj ishlari sifatini tekshirish uchun shaharsozlik faoliyati subyektlaridan belgilangan tartibda loyiha, texnologik va ijro hujjatlari, shuningdek, boshqa zarur ma’lumotlarni so’rash va olish;
pudratchi tashkilotlarga konstruksiyalarning alohida detallarini ochish, poydevordagi va qayta to’ldiriladigan tuproqni tekshirish ishlarini topshirish, zarurat bo’lganda, tegishli xulosa tayyorlash uchun ilmiy-tadqiqot tashkilotlaridan ekspert-mutaxassislarni jalb qilish;
shaharsozlik sohasidagi qonunlar talablarini buzayotgan (buyruqlar bilan tayinlagan) mansabdor shaxslarni javobgarlikka tortish haqida taqdimnomalar kiritish;
qurilish-montaj ishlarining sifati va loyiha bo’yicha to’liq bajarilganligi, qurilish obyektlarining texnik holati haqida ekspert xulosalari berish;
statistika organlariga foydalanish uchun qabul qilish qoidalari buzilgan holda topshirilgan qurib bitkazilgan obyektlarni hisobdan chiqarish haqida taqdimnoma kiritish;
hududiy davlat va xo’jalik boshqaruvi organlari, mahalliy davlat hokimiyati organlarining arxitektura va qurilish sohasidagi islohotlarni amalga oshirish masalalariga oid yig’ilishlarda belgilangan tartibda ishtirok etish;
Inspeksiya topshirig’iga binoan arxitektura va qurilish masalalari bo’yicha majlislar va seminarlar tashkil qilish va o’tkazish;
Hududiy qurilish nazorat inspeksiyasining moddiy-texnika bazasini takomillashtirish bo’yicha takliflar kiritish;
Hududiy qurilish nazorat inspeksiyasi manfaatlarini himoya qilish, shuningdek, Hududiy qurilish nazorat inspeksiyasi vakolatiga kiruvchi masalalar bo’yicha da’vogar va javobgar bo’lish;
Hududiy qurilish nazorat inspeksiyasi qonunchilikka muvofiq boshqa huquqlarga ham ega bo’lishi mumkin.
Hududiy qurilish nazorat inspeksiyasi quyidagilar uchun javob beradi:
o’ziga yuklangan vazifa va funksiyalarni tegishli hamda samarali bajarish;
shaharsozlik faoliyati subyektlarining qurilish-montaj ishlari sifatini loyiha hujjatlariga muvofiq ravishda ta’minlaganliklarini zarur darajada nazorat qilish;
qurilish obyektlarida ishlatilayotgan qurilish materiallari, konstruksiyalari va buyumlarining texnik jihatdan tartibga solish me’yoriy hujjatlari talablariga muvofiqligini zarur darajada nazorat qilish;
qurilish materiallari, konstruksiyalari va buyumlari, ishlab chiqaruvchilar tomonidan texnik jihatdan tartibga soluvchi me’yoriy hujjatlar talablariga rioya etilganligini zarur darajada nazorat qilish;
Hududiy qurilish nazorat inspeksiyasi faoliyatiga oid prognoz ko’rsatkichlariga erishishni ta’minlash;
Qoraqalpog’iston Respublikasi, viloyatlar va Toshkent shahrida tadbirlar rejalari, «yo’l xaritalari» va boshqa me’morchilik hamda qurilish sohasini rivojlantirishga, muammoli masalalarni hal qilishga oid dasturiy hujjatlarni samarali amalga oshirish;
fuqarolar va tadbirkorlik subyektlarining qurilish sohasida huquqiy va qonuniy manfaatlariga rioya qilinishini va himoyasini ta’minlash;
arxitektura va qurilish sohasida qonunlarning ijro etilishi, aniqlangan qonunbuzarlik holatlarining o’z vaqtida ko’rib chiqilishini ta’minlash hamda o’z vakolati doirasida tegishli chora-tadbirlar ko’rish.
Inspeksiyaga O’zbekiston Respublikasi Qurilish vaziri tomonidan lavozimga tayinlanadigan va lavozimdan ozod etiladigan boshliq rahbarlik qiladi.
Inspeksiya boshlig’i lavozim bo’yicha Qoraqalpog’iston Respublikasi Qurilish vazirining, viloyatlar va Toshkent shahar qurilish bosh boshqarmalari boshlig’ining o’rinbosari hisoblanadi.
Inspeksiya boshlig’ining belgilangan tartibda lavozimga tayinlanadigan va lavozimdan ozod etiladigan bir nafar o’rinbosari bo’ladi.
Inspeksiya boshlig’i bo’lmagan paytlarda boshliq vazifasini uning o’rinbosari bajaradi.
Qoraqalpog’iston Respublikasi, viloyatlar va Toshkent shahri Hududiy qurilish inspeksiyalari boshliqlari O’zbekiston Respublikasi Qurilish vaziri tomonidan tegishli ravishda Qoraqalpog’iston Respublikasi Qurilish vaziri, viloyatlar va Toshkent shahri qurilish bosh boshqarmalari rahbarlari tavsiyasiga binoan lavozimga tayinlanadi va lavozimdan ozod qilinadi.
Inspeksiya boshlig’i Hududiy qurilish nazorat inspeksiyasining shtatlar jadvalini tasdiqlaydi.
Hududiy qurilish nazorat inspeksiyasi o’z vakolati doirasida davlat va xo’jalik organlarining hududiy bo’linmalari, mahalliy davlat hokimiyati organlari va boshqa tashkilotlar bilan hamkorlik qiladi.
