21-боб. Ингичка ичак тутилиши

Гастрографинли синама

Аввал меъдани бўшатиб олгач, назогастрал найча орқали меъдага 100 мл гастрографин киритилади ва найча 2 соатга ёпиб қўйилади. Орадан 4-6 соат ўтгач, қориннинг оддий рентгенографияси бажарилади. Бу рентген жиҳози остида шунчаки, номига ўтказиладиган текширув эмас. Беморингизга барий берилмаганига амин бўлинг (4-боб).

• 
  Йўғон ичакда контраст модданинг топилиши қисман ичак тутилишидан дарак беради. Кўпчилик ҳолларда гастрографин тез орада тўғри ичакка етиб боради. Қисман ичак тутилишида гастрографин даволовчи таъсир кўрсатиб, обструкциянинг ечилишини тезлаштиради. Ва аксинча, агар 6 соат ичида контраст модда йўғон ичакка етиб бормаса, ичак тутилиши тўла эканини билдиради. Гастрографинли синов манфий бўладиган бўлса, бундай ИИТ нинг ўз-ўзидан тузалиб кетиш эҳтимоллиги жудаям кам бўлади ва ушбу беморларнинг аксарияти барибир операция бўлади. Шундай экан, ундан кўра, ҳозир операция қилиб қўйган яхши эмасми?!
  
• 
  Контраст модданинг меъдадан ингичка ичак бўшлиғига ўта олмаслиги гастрографинли синаманинг салбий натижасининг бир кўринишидир. Бундай натижа ингичка ичакда босим жуда юқори эканини билдириб, дарҳол операция қилишга кўрсатма бўлиб хизмат қилади.
  

Демак, агар бемор кечки пайт мурожаат қилиб келса ва унда шошилинч операцияга кўрсатмалар бўлмаса, биз беморга гастрографин берамиз. Мабодо эрталабгача контраст модда йўғон ичакка тушмаса, унда беморни операция қиламиз. Ўз-ўзидан маълумки, гастрографинли синаманинг натижалари бемордаги касалликнинг клиник кўриниши билан тўла мослиги текширилади. Билингки, гастрографин сурункали тавсифли сиқилишга эга бўлган ингичка ичак бўшлиғидан ўта олиш хусусиятига эга. Обструкция ечилса, қориндаги белгилар ўтиб кетади.
Бундай ёндашув бизни ўша эслаб ўтган машҳур иборани (“Ингичка ичак тутилишида қуёш ботишига ҳам, чиқишига ҳам йўл қўйманг”) бироз ўзгартириб талаффуз этишга мажбур қилади. Мана унинг янги талқини: тўлиқ ингичка ичак тутилиши билан оғриган беморнинг операциясини ҳеч қачон 24 соатдан ортиқ муддатга кечиктирманг.