21-боб. Ингичка ичак тутилиши

Қачон операция қилиш керак?

Ҳар бир беморнинг даволаш ёндашувида 1-2 соатлик инфузион даво ўрин олиши керак. Регидратация ва бемор гемодинамик кўрсаткичларининг қайта тикланганлик даражасини, назогастрал декомпрессиянинг самарадорлигини яна бир бор баҳоланг. Шундан кейин оғриқнинг тавсифи ўзгардими? Қорин рентгенографиясида ижобий ўзгаришлар борми?

Шошилинч операция қуйидаги кам сонли беморларга кўрсатма бўлади: аҳволи яхшиланмаганлар; доимий оғриқлар давом этаётганлар; қориндаги таранглик ва ичак маҳсулининг ҳаракатсиз турганлик белгилари (меъдадан нажассимон маҳсул ажралиши, тизимли яллиғланиш белгилари) қўшилиб келган беморлар. Бундай беморларнинг қорин рентгенограммасида тўла ичак тутилиши белгилари кузатилади. Уларда страншуляция хавфи юқори бўлади. Бу тоифа беморлар учун шошилинч операция хонасини асраб қўйинг.
Дастлабки консерватив давони беморларнинг аксариятида қўллаш мумкин, чунки “томчилаб қуйиш – сўриб олиш” қоидасига амал қилувчи ёндашувдан кейин уларнинг кўпчилигининг аҳволи енгиллашади. Мен баҳс бойлашим мумкинки, рентгенологик жиҳатдан қисман обструкция белгилари бўлган ва қисман ичак тутилиши билан мурожаат қилган беморлар, одатда, ушбу даволаш босқичидан сўнг операцияга муҳтожлик сезмайдилар, айни дамда тўла ичак тутилиши билан оғриган беморлар операция столига ётқизиладилар. Барибир, консерватив давони қай муддат хавфсиз давом эттириш мумкин? Айрим жарроҳлар, агар беморларнинг аҳволи 24 соат ичида енгиллашмаса, консерватив давони тўхтатишади, негаки, ҳатто нисбатан тинч бўлган қорин фонида ҳам доимий симилловчи оғриқлар бўлса, странгуляцияни тўла истисно қилиб бўлмайди. Бошқалари эса 5 кунгача операциясиз даволашни ва айниқса, анамнезида битишмали ичак тутилиш аломатлари бўлган беморларни диққат билан кузатишни давом эттирадилар.
Шошилинч операцияга мутлоқ кўрсатмалар бўлмаса, ингичка ичак тутилиши, деган диагноз қўйилган заҳоти биз оғиз орқали сувда эрувчан контраст модда (яъни Гастрографин) беришни маъқул деб биламиз. Гастрографин гиперосмоляр модда бўлгани сабабли ичак перистальтикасини кучайтирди, шунинг учун ҳам иккита: ташхисий-башоратловчи ва даволовчи хусусиятга эгадир.