2-mavzu: Milliy g`oyaning nazariy kontseptual asoslari

Milliy g`oyaning ishonch hamda e`tiqodga aylanishida ob`ektiv va sub`ektiv omillar

Milliy g`oyani xalqning ishonchi, e`tiqodiga aylantirish asoslarini, shartli ravishda, ob`ektiv shart-sharoitlar va sub`ektiv omillarga ajratish mumkin.. Milliy goyani xalq ishonchi va e`tiqodiga aylantirishning ob`ektiv shart-sharoitlari sifatida: ijtimoiy-iqtisodiy hayot negizlari, madaniy hayotni rivojlantirish manbalari, inson salohiyati, millatning tarixiy merosi va unga bo`lgan munosabat; xalq yashayotgan hududning tabiiy-jo`g`rofiy joylashishi hamda tabiiy resurslari; millatning tarixiy shakllangan mentalitetiga xos xususiyatlar; jamiyatning demografik holati, etnik tuzilishi; xalqaro ijtimoiy, iqtisodiy, siyosiy munosabatlardagi o`rni va mavqei va boshqa shu kabi shart-sharoitlarni ko`rsatish mumkin.

Sub`ektiv omillar jumlasiga esa, milliy g`oyani xalq ishonch va e`tiqodiga aylantirishga yo`naltirilgan insonlar, turli ijtimoiy guruhlar, oila, mahalla, milliy-madaniy markazlar, siyosiy partiyalar, jamoat birlashmalari, xalqning intelektual salohiyatini yuksaltirishga yo`naltirilgan ta`lim-tarbiya tizimining qonuniy huquqiy asoslari va dasturlari; ommaviy axborot vositalari; umuman, jamiyat milliy g`oyasini shakllantirish va uni xalq ishonch e`tiqodiga aylantirishning ma`naviy-ma`rifiy kompleksi bilan bog`liq omillarni o`z ichiga oladi.

Bu omillarning har biri milliy g`oyani keng jamoatchilik ongiga singdirishda muhim o`rin tutadi. Masalan, hozirgi zamon ta`lim-tarbiya tizimining asosiy vazifalaridan biri turli fan yo`nalishlari orqali yoshlar ongida Milliy istiqlol g`oyasini izchil shakllantirishdan, xalqning ishonch va e`tiqodiga aylantirishdan iborat. Chunki, har qanday ta`lim-tarbiya sohasining markazida turuvchi: insonparvarlik, vatanparvarlik, millatparvarlik, tinchliksevarlik g`oyalari, eng avvalo, Milliy istiqlol g`oyasi doirasida o`z mazmunini konkretlashtiradi va namoyon qiladi. Zero, insonning har qanday ezgu g`oyalari — Ona-Vatanga muhabbat, uning mustaqilligini mustahkamlash g`oyalaridan tashqarida ijtimoiy-ma`naviy ahamiyatga ega bo`lishi mumkin emas.