2-Мавзу: Диний қадриятлар ва ислом маънавиятининг тикланиши

Диний ташкилотлар
16 та диний конфессияга мансуб бўлган 2256 та диний ташкилот фаолият кўрсатмоқда.Шундан 175 таси христианлик диний ташкилоти, 8 таси яҳудий, 6 таси баҳоий жамоалари, 1 таси “Иегово шоҳидлари”,1 таси Кришна жамияти, 1 таси Будда ибодатхонаси, 1 та Ўзбекистон конфессиялараро Библия жамияти, 2063 таси ислом диний ташкилотлари мавжуд. (2019 йил маълумоти.)
АҚШ тарихида илк бор 2019 йил 26 июль куни Вашингтон шаҳрида дин эркинлиги масалалари бўйича вазирлар даражасидаги конференция бўлиб ўтди. Унинг ишида Ўзбекистон Республикаси делегацияси билан бир қаторда 80 дан ортиқ мамлакат вакиллари – ташқи ишлар вазирлари, халқаро ташкилотлар раҳбарлари, диний етакчилар ва фуқаролик жамияти фаоллари иштирок этди. Юқори даражадаги тадбирда сўзга чиққан АҚШ вице-президенти М.Пенс, АҚШ Давлат котиби М.Помпео, АҚШнинг алоҳида топшириқлар бўйича элчиси С.Браунбэк Ўзбекистоннинг инсон ҳуқуқлари соҳасидаги, айниқса, эътиқод эркинлигини таъминлаш борасида муваффақиятларга эришаётганини қайд этиб, Ўзбекистон Республикаси раҳбариятининг мазкур йўналишдаги ислоҳотларни давом эттиришга интилиши қатъий эканини таъкидладилар. Мамлакатимиз ҳаётида реал ўзгаришлар рўй бераётгани конференциянинг бошқа иштирокчилари томонидан ҳам эътироф этилди.
Биринчи навбатда, давлатимизнинг ушбу муҳим соҳадаги сиёсати Ўзбекистон Республикасини янада ривожлантириш бўйича Ҳаракатлар стратегиясида ўз аксини топган. Стратегиянинг бешинчи йўналишида “Хавфсизлик, миллатлараро тотувлик ва диний бағрикенгликни таъминлаш ҳамда чуқур ўйланган, ўзаро манфаатли ва амалий ташқи сиёсат соҳасидаги устувор йўналишлар” белгиланган.
Стратегиянинг ушбу йўналишида амалга оширилган ишларни чуқур таҳлил қилинганда, 25 та амалий ислоҳотни амалга оширишни кўзда тутадиган 54 дан ортиқ қонун ҳужжати қабул қилинганининг ўзи бу борадаги давлат сиёсатида жиддий ўзгаришлар ва ҳақиқий сифат жиҳатидан янгиланишлар миқёсидан далолат беради.
Иккинчидан, мамлакатимиз халқаро шериклар, хусусан, БМТ Инсон ҳуқуқлари бўйича Олий комиссари, Human Rights Watch, Amnesty International каби ва бошқа дунёга машҳур нотижорат ноҳукумат ташкилотлар билан конструктив ҳамкорлик учун ўз эшикларини очди.
Таъкидлаш жоиз, узоқ йиллардан буён биринчи марта БМТнинг эътиқод эркинлиги бўйича махсус маърузачиси Аҳмад Шаҳид Ўзбекистонга келди. Ушбу ташрифнинг якунлари Ўзбекистон парламенти томонидан қабул қилинган алоҳида ҳужжатда ўз аксини топди. Мазкур ҳужжат эътиқод эркинлигини таъминлаш, эътиқод эркинлиги тўғрисидаги қонунчиликни қайта кўриб чиқиш ва диний ташкилотлар фаолиятини соддалаштиришга қаратилган комплекс тадбирларни амалга ошириш кўзда тутилди.