1. Шахсий суғуртанинг моҳияти ва суғурта тизимида тутган ўрни Давлат мажбурий шахсий суғуртаси турлари

Спортчиларни суғурталаш.
Суғурта шартномалари Ўзбекистон Республикаси ва ҳорижий мамлакатлар юридик шахслари ҳамда тўла фуқаролик салоҳиятига эга бўлган жисмоний шахслар билан тузилади.
Суғуртанинг объекти сифатида фойдасига шартнома тузилаётган, мусобақаларда қатнашувчи спортчининг ҳаёти ва соғлиги ҳисобланади.
Суғурталанган шахс ўзининг вафотида суғурта суммасини олувчи сифатида (Манфаатдор шахс) исталган шахсни белгилаш ҳуқуқига эга. Агар бундай шахс белгиланмаган бўлса, у ҳолда суғурталанувчининг ўлими ҳолатида суғурта суммасини олувчи бўлиб суғурталанувчининг қонуний меъросхўрлари ҳисобланади.
Мазкур суғурта тури бўйича компаниянинг суғурталанувчига суғурта қопламасини ёки манфаатдор шахсга суғурта пулини тўлаш мажбуриятини келтириб чиқарувчи, ҳақиқатда содир бўлган ҳодиса суғурта ҳодисаси ҳисобланади.
Суғурта ҳодисалари сифатида суғурта шартномасини амал қилиш даврида суғурталанувчининг тан жароҳати олиши, соғлигини йўқотиши ёки ўлими тан олинади.
Юқорида кўрсатиб ўтилган ҳолатлар суғурта ҳодисалари деб тан олинмайди ва улар бўйича тўловлар амалга оширилмайди, агарда улар:
а) турли хилдаги ҳарбий ҳаракатлар (уруш эълон қилинган ёки қилинмаганлигидан қатъий назар), террорчилик ҳаракатлари, фуқаролик уруши, инқилоблар, ғалаён ёки шунга ўхшаш қўзғалишлар, шунингдек ички тартибсизликлар (митинглар, қўзғолонлар, иш ташлашлар, намойишлар) натижасида содир бўлса;
б) жиноят содир қилиш ёки жиноят содир қилишга уриниш пайтида содир бўлган бўлса, ўзини жонига қасд қилган бўлса;
в) допинг истеъмол қилганлиги тасдиқланса;
г) алкоголь, наркотик ёки токсик маст ҳолатда рўй берган бўлса.
Барча турдаги касалликлар, шу жумладан касбий ва инфекцион касалликлар, шунингдек озиқ-овқат ёки дори-дармонларни истеъмол қилиш натижасида юзага келган бетобликлар бахтсиз ҳодисалар ҳисобланмайди. Инфаркт ва инсульт бу суғурта тури бўйича бахтсиз ҳодиса оқибати деб қаралмайди.
Мазкур суғурта тури бўйича суғурта мукофоти (бадали) компанияда тасдиқланган тариф ставкалари, суғурта суммаси, суғурталанувчиларнинг сони, спорт тури ва суғурта ҳодисасини содир бўлиш таваккалчилиги даражасига таъсир этувчи бошқа омиллардан келиб чиқиб белгиланади.