1. экономиканы модернизациялаў шараятында есап системасының орны ҳӘМ ӘҲмийети реже

18-статья. Дәраматлар ҳәм қәрежетлерди есапқа алыў
Дәраматлар ҳәм қәрежетлер төленген ўақты ҳәм пул келип түскен сәнеге қарамастан, қайсы дәўирге байланыслы болса, усы есабат дәўиринде бухгалтерия есабы стандартларына муўапық сәўлелендириледи.
Өзбекистан Республикасы Мәмлекет бюджетиниң ҳәм мәмлекет мақсетли жамғармалары бюджетлериниң орынланыўы бойынша дәраматлар ҳәм қәрежетлер бюджет ҳақкындағы нызам ҳүжжетлерине муўапық сәўлелендириледи.
19-статья. Меншик капиталды есапқа алыў
Меншик капитал устав фондынан (устав капиталынан), қосылған, резерв капиталынан ҳәм бөлистирилмеген пайдадан қуралады.
Устав фонды (устав капиталы) шөлкемлестириўшилик ҳүжжетлеринде белгиленген үлеслериниң (пулда сәўлелендирилген ҳалдағы) жыйындысын сәўлелендиреди. Устав фондына (устав капиталына) үлеслер формасында киритилетуғын материаллық ҳәм материаллық емес активлер шөлкемлестириўшилер (қатнасыўшылар) ортасындағы келисимге байланыслы баҳаланады, нызамда нәзерде тутылған ҳалларда болса, баҳалаўшы мекеме тәрепинен баҳаланыўы керек.
Қосылған капитал акцияларды номинал қунынан жоқары баҳаларда дәслепки сатыўдан алынатуғын эмиссия дәраматын, сондай-ақ эквиваленти шет ел валютасында көрсетилген устав фондын (устав капиталын) қәлиплестириў процессинде жүзеге келетуғын курслық парықты сәўлелендиреди.
Резерв капиталы узақ мүддетли активлерди қайта баҳалаўда пайда болатуғын инфляция резервлерин, нызам ҳүжжетлеринде ҳәм шөлкемлестириў ҳүжжетлеринде белгиленген муғдарларда сап пайдадан ажыратпаларды сондай-ақ тегинге (мутқа) алынған мал-мүликтиң қунын сәўлелендириледи.
Бөлистирилмеген пайда пайданың жәмленип атырғанлығын аңлатады ҳәм мүликдарлардың қарарына байланыслы устав фондына (устав капиталына) қосылыўы мүмкин.
20-статья. Гиреўди есапқа алыў
Өзиниң ямаса басқалардың миннетлемелерин тәмийинлеў ушын гиреўге берилген мүлктиң қуны, соның ишинде пул қаржылары бухгалтерия есабы субъекти тәрепинен басқа активлерден бөлек есапқа алынады.
Гиреўге алынған мүлктиң қуны, гиреў сыпатында қабыл етип алынған пул қаржылары ҳәм валюта байлықлары бөлек балансдан тысқары счетларда сәўлелендириледи.