Ҳ. А. АрFинбоев, Ҳ. У. Абдуллаев, А. М

5.5. Жойларнинг ҳарорат режимлари тавсифлари
Қишлоқ хўжалиги мақсадлари учун катта ҳудудларнинг ёки айрим жойларнинг ҳарорат режимини баҳолашда қуйидагиларга аҳамият берилади:

1. 
   Ўртача суткалик, ўртача ойлик ва ўртача йиллик ҳароратлар.
   
2. 
   Максимал ва минимал ҳаво ҳароратлари. Ҳаво ҳароратининг суткалик ва йиллик ўзгариши амплитудалари.
   

Ҳавонинг ўртача суткалик ҳароратини аниқлаш учун ҳаво ҳароратини бир суткада 8 марта, яъни ҳар 3 соатда ўлчаб борилади, 8 марта ўлчаш натижаларини ўзаро қўшиб, 8 га бўлинади. Бошқача айтганда ҳавонинг ўртача ҳарорати 1 суткада ўтказилган 8 та ўлчаш натижаларининг ўртача арифметик қийматидир. Ўртача ойлик ҳарорат ой давомидаги ўртача суткалик ҳароратларнинг йиғиндисини ойдаги кунлар сонига тақсимлаб аниқланади. Ўртача йиллик ҳаво ҳароратини эса, ўртача ойлик ҳароратлар йиғиндисини йилдаги ойлар сонига, яъни 12 га тақсимлаб аниқланади.
Ҳавонинг ўртача йиллик ҳарорати иссиқликнинг умумий миқдори ҳақида тасаввур берсада, у ҳароратнинг йил давомида ўзгаришини кўрсатмайди.
Ўртача ойлик ва ўртача декадалик ҳароратларни алоҳида даврлардаги ҳарорат шароитини тавсифлаш учун фойдаланилади. Аммо барча ўртача қийматлар ҳароратнинг суткалик ва йиллик ўзгаришининг бориши ҳақида тўла тасавур бермайди. Ўсимликларнинг ўсиши ва ривожланиши учун эса ҳаво ҳароратининг суткалик ва йиллик ўзгаришининг бориши муҳим аҳамиятга эга.
Иссиқлик шароитини тўлароқ тавсифлаш учун юқоридагилардан ташқари ҳавонинг максимал, минимал ҳароратларини ҳам билиш керак. Масалан, алоҳида ойлардаги минимал ҳароратни билиш орқали кузги экинлар ва мевали дарахтларнинг қишлови шароитлари ҳақида фикр юритилади.
Ёзда эса максимал ҳарорат ҳақидаги маълумотлар энг иссиқ кунлар сонини кўрсатади.
Ҳаво ҳароратининг суткалик ва йиллик ўзгариш амплитудаси иқлимнинг континенталлигини белгилайди.
Масалан, Ўзбекистон океан ва денгизлардан узоқда, Евроосиё материгининг ичкарисида жойлашгани учун континентал иқлимга эга бўлиб, ҳаво ҳароратининг суткалик ўзгариш амплитудаси 15-20С га тенг, бу эса қишлоқ хўжалик далаларининг иссиқлик режимининг муҳим кўрсаткичидир.