Янги конструкциядаги саралаш машинаси ишчи юзасининг қиялигини аниқлаш

ЯНГИ КОНСТРУКЦИЯДАГИ САРАЛАШ МАШИНАСИ ИШЧИ ЮЗАСИНИНГ ҚИЯЛИГИНИ АНИҚЛАШ


Г.А.Бахадиров¹, Б.Т.Умаров², Н.Ғ.Обидов<sup>3


1</sup>ЎзР ФА Механика ва иншоотлар сейсмик мустаҳкамлиги институти,
²Наманган муҳандислик - қурилиш институти
³Фарғона политехника институти


Картошкани саралаш қурилмалари орасида конструкциясига кўра содда ва нисбатан талабларни қониқтирувчи қурилма барабанли саралаш машинаси ҳисобланади. Ишчи жиҳози барабан кўринишида бўлган илдизмеваларни саралаш ва тозалаш машиналарининг турли кўринишлари мавжуд бўлиб, улар бир - биридан саралаш юзасининг тайёрланишига кўра фарқ қилади. Масалан, айрим турларда барабан юзаси ҳивичлар ёки ҳалқалардан ташкил топган бўлса, айримларида пружинасимон деталлардан ташкил топган. Барабан кўринишидаги саралаш машиналарининг умумий камчилиги шундан ибаратки, иш жараёнида сараланаётган маҳсулот барабаннинг фақат пастки қисмида жойлашади, яъни ишчи юзанинг тахминан 16 % қисмидан фойдаланилади холос [1, 2, 3, 4]. Бу эса ўз навбатида самарадорликнинг юқори бўлмаслигига сабаб бўлади.
Юқоридаги камчиликни инобатга олган ҳолда янги конструкциядаги жиҳоз тавсия этилмоқда. Мазкур жиҳознинг ўзига хос хусусияти саралаш юзаси туганакларнинг саралаш юзаси бўйлаб ҳаракати йўналишида туйнукларининг ўлчами катталишиб борадиган, учлари туташган ва иккита барабанларга таранг тортилган ҳолатда кийдирилган эластик тўрдан тайёрланади (1-расм).

1-етакловчи барабан, 2-етакланувчи барабан, 3-эластик тўр, 4-редуктор, 5-электродвигатель
1-расм. Таклиф қилинаётган саралаш машинасининг схематик кўриниши
Бунда барабанларнинг диаметри эластик тўрнинг диаметридан анча кичик бўлганлиги учун саралаш юзасидан самарали фойдаланилади, барабанлар турли баландликда ва горизонтга нисбатан қия қилиб ўрнатилганлиги туганакларни саралаш юзасидан ажралмаган ҳолатда ҳаракатланишига имкон беради ва туганаклар шикастланмасдан аниқ сараланади [5].
Таклиф қилинган машинанинг самарали ишлашини таъминлаш учун машина параметрларининг мақбул қийматларини аниқлаб олишимиз керак. Саралаш юзаси қиялик бурчакларининг мақбул қийматларини аниқлаш учун саралаш юзасида жойлашган туганакка таъсир этадиган кучларни ва туганакнинг мувозанат ва текис ҳаракатланиш шартларини аниқлаймиз.
Дастлаб саралаш юзасида жойлашган туганакка таъсир этадиган кучларни аниқлаймиз. Текис ҳаракатланаётган юзада жойлашган туганакка туганакнинг оғирлик кучи, реакция кучи ва ишқаланиш кучи таъсир қилади (2-расм).