Мавзу №1: шаҳар ҳудудларида жамоат тартиби ва хавфсизлигини таъминлашни ташкил этиш тартиби ва йўналишлари

МАВЗУ № 1: ШАҲАР ҲУДУДЛАРИДА ЖАМОАТ ТАРТИБИ ВА ХАВФСИЗЛИГИНИ ТАЪМИНЛАШНИ ТАШКИЛ ЭТИШ ТАРТИБИ ВА ЙЎНАЛИШЛАРИ

1. 
   Жамоат тартиби, жамоат хавфсизлиги тўғрисидаги асосий тушунчалар, жамоат хавфсизлигига таҳдидларнинг олдини олиш ва жамоат хавфсизлигини таъминловчи органлар ҳамда муассасаларнинг иштироки.
   
2. 
   Ўзбекистон Республикаси Вазирлар Маҳкамаси, маҳаллий давлат ҳокимияти, Ички ишлар органлари ва Миллий гвардияси органларининг жамоат хавфсизлигини таъминлаш соҳасидаги ваколатлари.
   
3. 
   Ҳуқуқни муҳофаза қилувчи органлар томонидан фуқароларни жамоат хавфсизлигини таъминлашга жалб этиш.
   
4. 
   Жамоат тартиби ва хавфсизлигини таъминлашни ташкил этиш тартиби ва йўналишлари.
   

Жамоат хавфсизлигига таҳдидларнинг олдини олиш ва бевосита жамоат хавфсизлигини таъминловчи органлар, ҳамда муассасалар
Жамоат хавфсизлигини таъминлаш ва жамоат хавфсизлигига таҳдидларнинг олдини олиш Ўзбекистон Республикаси миллий хавфсизлигининг таркибий қисми сифатида давлат сиёсатининг устувор йўналишларидан биридир.
Барча давлат органлари, фуқароларнинг ўзини ўзи бошқариш органлари, фуқаролик жамияти институтлари ва фуқароларнинг ўзаро мустаҳкамлик ва ҳаракат бирлиги асосида яқин ҳамкорлиги жамоат хавфсизлиги таъминлашнинг гаровидир.
Жамоат хавфсизлигига таҳдидларни олдини олиш давлат органлари, фуқароларнинг ўзини ўзи бошқариш органлари ва жамоат бирлашмалари, шунингдек, корхона, муассаса ва ташкилотлар томонидан сиёсий, ижтимоий-иқтисодий, ҳуқуқий ва бошқа профилактик чора-тадбирлар мажмуи орқали амалга оширилади.
 Фуқароларнинг ўзини ўзи бошқариш органлари, бошқа жамоат бирлашмалари, корхоналар, муассасалар ва ташкилотлар, идоравий бўйсинуви ва мулкчилик шаклидан қатъий назар, мансабдор шахслар ҳамда фуқаролар жамоат хавфсизлигини бевосита таъминловчи органлар ва муассасаларга кўмаклашишга ва зарурий ёрдам кўрсатишга мажбурдир.