Мавзу №1: шаҳар ҳудудларида жамоат тартиби ва хавфсизлигини таъминлашни ташкил этиш тартиби ва йўналишлари

3-ўқув саволи
Ҳуқуқни муҳофаза қилувчи органлар томонидан фуқароларни жамоат хавфсизлигини таъминлашга жалб этиш
Ҳуқуқни муҳофаза қилувчи органлар фуқароларни, уларнинг розилиги билан, шахснинг ҳаёти, соғлиғи, шаъни ва қадр-қимматини, мол-мулкини, жамият ва давлат манфаатларини ғайриқонуний тажовузлардан ҳимоя қилиш, шунингдек, аҳолининг ҳуқуқий онги ва ҳуқуқий маданиятини юксалтириш ҳамда ҳуқуқбузарликларнинг олдини олиш тадбирларида амалий ёрдам кўрсатиш ва иштирок этишга жалб қилишлари мумкин.
Ҳуқуқни муҳофаза қилиш органлари томонидан фуқароларнинг жамоат хавфсизлигини таъминлашга жалб этиш тартиби Ўзбекистон Республикаси Вазирлар Маҳкамаси томонидан белгиланади.
Ҳуқуқни муҳофаза қилиш органлари томонидан жамоат хавфсизлигини таъминлашга жалб этилган фуқароларнинг мажбуриятлари
Ҳуқуқни муҳофаза қилиш органлари томонидан жамоат хавфсизлигини таъминлашга жалб этилган фуқаролар қуйидагиларга мажбур:
жамоат тартибини сақлаш ва жамоат хавфсизлигини таъминлаш соҳасидаги қонун ҳужжатлари ва бошқа норматив-ҳуқуқий ҳужжатлар талабларини билишга ва уларга риоя қилишга;
ваколатли ходимларнинг белгиланган тартибда берилган ва қонунга зид бўлмаган кўрсатмаларини бажаришга;
фуқаролар, жамоат бирлашмалари ва бошқа ташкилотларнинг ҳуқуқлари ва қонуний манфаатларига риоя қилишга;
фуқароларга бахтсиз ҳодисаларда, жароҳат олганда, заҳарланганда, ҳаёти ва соғлиғига таҳдид солувчи ночор аҳволда қолганда биринчи тиббий ёрдам кўрсатишга;
авариялар, фалокатлар, ёнғинлар, табиий офатлар ва бошқа фавқулодда вазиятларда аҳолини, тегишли органларни хабардор қилиш ва одамларни қутқариш бўйича кечиктириб бўлмас чораларни кўришга;
жиноят ёки маъмурий ҳуқуқбузарлик содир этилган жойда жароҳатланган фуқароларга биринчи тиббий ёки бошқа ёрдам кўрсатилишини ташкил этишга;
ўзи билан намунаси ва бериш тартиби тегишли ҳуқуқни муҳофаза қилиш органи томонидан белгиланган тасдиқловчи ҳужжатни олиб юришга ва ноқонуний ҳаракатни тўхтатиши талаб қилинаётган фуқарога кўрсатишга;
Ҳуқуқни муҳофаза қилиш органлари томонидан жамоат тартибини сақлаш ва жамоат хавфсизлигини таъминлашга жалб этилган фуқаролар қонунга мувофиқ бошқа мажбуриятларга ҳам эга бўлиши мумкин.